Omubaka Omukyala akiikirira District ye Kalangala Hellen Nakimuli abaddeyo ku kaadi ya NUP, avudde mu bulamu bw’ensi ku myaka 40 egy’obukulu.
Hellen Nakimuli yazaalibwa nga 2 July,1985, afudde nga 19 April,2026.
Akulira oludda oluvuganya government mu parliament Joel Ssennyonyi, ategeezezza nti yasembye okwogera ne Nakimuli ku makya ga leero ng’agenda mu ddwaliro lya Alexandra medical Center mu Kampala, okulongoosebwa obulwadde mu lubuto.
Agambye weyayogeredde naye Omubaka yeyabadde yevuga ng’agenda mu ddwaliro, era namutegeeza nti okulongoosebwa kwabadde tekugenda kubeera kw’amaanyi.
Nakimuli wafiiridde abadde aliko olukiiko lw’ababaka abali ku ludda oluvuganya government lwakwanaganya.
Amyuka omubaka wa president mu district e Kalangala Henry Lubuulwa, ategeezezza nti okufa kw’Omubaka Nakimuli kulese eddibu ddene eri abantu be Kalanga awatali kwawula mu bibiina byabufuzi byebakkiririzaamu, kuba buli kyabadde asaka nga kibagasiza wamu.
Omubaka Hellen Nakimuli yasembyeeyo okwoogera mu lujjudde lw’Abantu ku Monday nga 13 April,2026 ku Eklesia ya Orthkdox e Namuηηoona, Obuganda gyebwajagulizza Amazaalibwa ga Ssaabasajja Kabaka agemyaka 71.
Omubaka Hellen Nakimuli gyeyasabidde nti wabeewo Obwenkanya mu ngabanya y’Ebifo mu governmenr n’abenzikiriza ya Orthodox erowoozebweko, saako essiga eddamuzi okubaako kyekola ku bantu abasibibwa mu makomera olw’ebyobubufuzi bawozesebwa mu bwangu.
Omubaka Nakimuli yatandika okukiikirira Kalangala mu 2021 mu parliament eye 11, nga wafiiridde babadde bamwongedde ekisanja zaalibwa ku kyalo Lukuba ekisangibwa mu gombolola ye Kyamuswa mu ssaza lye Ssese mu district ye Kalangala nga 2/7/1985.
Kitaawe ye mwami w’Essaza Ssese Kweba eyawummula Christopher Walusimbi, n’Omukyala Maria Nalwanga Walusimbi.
Ku ludda lw’Obwakabaka bwa Buganda Omubaka Hellen Nakimuli abadde musaale nnyo mu kuwagira Enteekateeka ya Luwalo Lwange , nga buli gombolola ye Kyamuswa lwebadde ekiika embuga abaddengawo.
Bisakiddwa: Kato Denis
