Government ya Uganda yegaanye enteekateeka ebadde ewulirwa mu nvuuvuumo n’emikutu gy’amawulire egimu, nti yakoze endagaano okubuddamya kuno abagwira, abatamanyiddwa muwendo government ya Netherlands beyagala okugoba ewaayo.
Abagwira abogerwako bebaava mu mawanga Africa ezenjawulo nebaddukira mu ggwanga lya Netherlands mu bumenyi bw’amateeka, Kati nga government ya Netherlands enoonya nsi ku ssemazinga Africa mwesobola okubasindika, babudamizibwe eyo.
Mu ntegeka eno eggwanga erikkiriza okubabudamya kigambibwa, nti Netherlands egenda kubawa ensimbi n’obuyambi z’okubalabirira.
Wabaddewo oluvuuvuumo nti ddiiru eno government ya Uganda yakkiriza abagwira bano baleetebwe mu Uganda.
Ssaabaminister wa Netherlands Dick Schoof yategezeza bannamawulire olunaku olweggulo, okusinziira ku mikutu egiri ku mutendera gw’ensi yonna egitali gimu, nti enteekateeka yokusindika abagwira mu Uganda bagirowoozaako.
Amawulire era galaga nti minister wa Netherlands avunanyizibwa ku nsonga z’okusuubuligana n’amawanga amalala Reinnette Klever ennaku bbiri eziyise, yabadde ku bugenyi mu Uganda, era yasisinkanye ba minister bakuno abawerako okwabadde minister w’ensonga zamawanga amalala Gen Jeje Odong, Minister Wa ssemateeka n’essiga eddamuzi Nobert Mao nabalala.
Mu nsisinkano zino, minister oyo owa Netherlands nebaminister ba Uganda baliko endagaano zebaataddeko emikono wabula tezitanamanyika bizirimu.
Minister wa Uganda omubeezi ow’ensonga z’amawanga amalala Henry Okello Oryem agambye nti ensonga ya government ya Uganda okukkiriza Netherlands okusindika kuno abagwiira tenagimanyaako, nti wabula naye yagisomye mu mawulire kubanga ne mu lukiiko lwaba minister tenatuukayo.
Uganda singa ekkiriza okubuddamya abagwiira, government ya Netherlands beyagobye ewaayo ssi gwe mulundi ogugenda okusooka.
Yabudamyako bannansi ba Afghanistan abawerako, abaali abakulembeze mu government eyali ewagirwa government ya America, eyavuunikibwa Abatalabaani emyaka mitono egiyise.
Waliwo nebanannsi ba Eriterea, aba Sudan n’abalala baabuddamizibwako mu Uganda.
Uganda ebibalo biraga nti erina abagwira abali eyo mu kakadde kamu n’ekitundu, beyabudamya edda.#
