Government ya Uganda ebaze ebbago ly’etteeka lyetuumye the East African Mediation Bill erigendereddwaamu okuteekesa mu nkola ebyakaanyizibwa mu ndagaano eyakolebwa amawanga ga East Africa, mu kiseera omukago gwa East Africa bwegwaali gusaanawo mu mwaka gwa 1977.
Mu mwaka gwa 1984, amawanga gannamukago guno ogwali gugudde, zaatuula nezikola endagaano yokukwatamu ebyobugagga ebyali eby’omukago, engeri yokusasula abakozi abaali ab’ebitongole byomukago, okugaba ebyobugagga n’ensonga.
Waliwo n’ensonga endala nnyingi ezaali zaalambikibwa mu ndagaano eyaggalawo omukago ogwo mu mwaka gwa 1977, wabula endagaano eyo eyakolebwa mu mwaka gwa 1984 yakoma mu bigambo, amawanga ga East Africa yadde kyaali kigakakatako okuziteeka mu nkola zaasulibwa muguluka.
Abakozi bangi abaali baweereza mu bitongole byomukago bamaze ekiseera nga balaajana, olw’ensimbi zaabwe okwali emisaala n’akasiimo okuva mu mwaka gwa 1977 nokutuusa kati tebazifunanga, nga nabamu bazze bava mu bulamu bwensi eno nga tebasasuddwa.
Mu mbeera eno government ya Uganda mwebagidde ebbago ly’etteeka lyegenda okwanjulwa olwaleero mu parliament, ng’eyita mu ministry yensonga za East Africa okuteekesa mu nkola ebyakaanyizibwako mu ndagaano eyaggalawo omukago gwa East African community ogwasooka.
Ebbago lyetteeka lino, ligenda kulambika engeri yokusasula abaali abakozi bebitongole bya East African Community nga wano mu Uganda alipooota ziraga nti bali mu 2000.#
