Bazzukulu ba Gabunga ebe Mamba Namakaka bawanduse mu mpaka z’ebika bya Baganda ez’omupiira ogw’ebigere ez’omwaka guno 2024, bakubiddwa Olugave goolo 1-0 eteebeddwa Brian Nkuubi.
Olugave luyiseewo okwesogga omutendera gwa ttiimu 16 ogw’okuvuganyiza mu bibinja ku goolo 3-1, kuba oluzannya olwasooka Olugave lwakuba e Mamba goolo 2-1.
Kkobe liwanduse mu mpaka zino bwe bakubidwa e Njaza goolo 4-3 eza peneti oluvanyuma lw’okugwa amaliri ga goolo 1-1.
Engeye nayo yesozze ebibinja oluvanyuma lwe Ntalaganya gye babadde balina okuzannya nayo obutalabikako, kyokka nga oluzannya olwasooka e Ngeye yaluwangula goolo 4-0.
Bazukulu ba Nsamba nabo besozze ebibinja bwe bawandudemu e Ndiga ku goolo 8-7 eza peneti oluvanyuma lwa ttiimu zombiriri okugwa amaliri ga goolo 1-1.
Emamba Kakoboza nayo ewanduddemu Omutima Omuyanja bw’egukubye goolo 3-0, nga oluzannya olwasooka Omutima gwawangula goolo 1-0.
Enkima ewanuddemu e Ffumbe ku mugatte gwa goolo 3-0, nga olwaleero e Nkima ekubye e Ffumbe goolo 2-0 ate n’oluzannya olwasooka e Nkima yawangula goolo 1-0.
Bannantamegwa b’empaka ezasembayo abe Ngoonge nabo besozze ebibinja oluvanyuma lw’okugwa amaliri n’Omusu ga goolo 1-1, nga oluzannya olwasooka e Ngoonge yaluwangula goolo 1-0.
Ensenene ewandudemu Amazzi ge Kisasi ku mugatte gwa goolo 11-02, nga olwaleero e Nsenene ewangudde goolo 5-1 ate nga oluzannya olwasooka yaluwangula goolo 6-1.
Embogo ewandudemu e Kinyomo bw’ekikubye goolo 3-1 ate n’oluzannya olwasooka e Mbogo yawangula goolo 1-0.
Akasimba kawandudemu e Njovu bwekagikubye goolo 3-1 yadde nga e Njovu yawangula oluzannya olwasooka ku goolo 1-0.
Ennyonyi Enyange ewandudemu e Ngo ku mugatte gwa goolo 4-2 newankubadde e Ngo olwaleero ewangudde goolo 2-1, wabula oluzannya olwasooka e Ngo teyalabikako era Ennyonyi Ennyange n’ewebwa goolo 3-0.
Empindi ewandudemu e Nvubu ku mugatte gwa goolo 6-2 ate nga ne Nte ewandudemu e Ngabi Ennyunga ku mugatte gwa goolo 3-0.
Ennyonyi Endiisa nayo eyiseewo oluvanyuma lwe Mbwa okulemererwa okuleeta ebiwandiko byabazannyi baayo era teguzanyiddwa, wadde nga omupiira ogwasooka e Mbwa yali yaguwangula 4-3.
Envuma ewanduddemu e Nnyonyi Nakinsige ku mugatte gwa goolo 3-1 ate nga Omutima Omusagi nagwo guwandudemu Obutiko ku goolo 2-0 eza peneti oluvanyuma lw’okulemagana goolo 2-2
Emipiira egy’ebibinja ebikola ttiimu 16 gigenda kutandika ku Friday nga 17 May,2024.
Bisakiddwa: Isah Kimbugwe
