Omutendera gw’emizannyo gy’ebitongole bya Buganda ogusooka guwedde, abategesi b’omwaka guno aba CBS bayiseewo okuzannya empaka z’omupiira ogw’ebigere eziddirira ez’akamalirizo.
Emipiira egy’akamalirizo saako emizannyo emirala gyakuzannyibwa nga 30 November,2024 mu Lubiri e Mengo.
Ebitongole okuli Cbs, BBS telefayina, Namulondo Investment, Nkuluze, Buganda Land Board, Eggwanika lya Buganda, Lubiri High school Mengo, Lubiri High school Buloba Campus, Buganda Royal institute, Namulondo investment, K2 Telecom, Buganda Heritage and Tourism Board, (BHTB), BICUL, nebirala byebyeetabye mu mizanyo gino.
Ttiimu ya Cbs abategesi eyiseewo okuzannya ku luzannya olwa Semi Finals nga yakuttunka ne Ttiimu ya K2 Telecom Ejjudde, ate Buganda Land Board, (BLB), yakuttunka ne Buganda Heritage and Tourism Board (BHTB).
CBS okuyitawo ewangudde Buganda Royal Institute ku ggoolo 1-0 ku mutendera gwa Quarter finals, ate Buganda Land Board ekubye BBS ku ggoolo 3-0, K2 Telecom ejeemu Nkuluze ku ggoolo 4-1.
BHTB eggyemu Lubiri High school Buloba Campus, nga bano basoose kugwa maliri ga 0-0, era BHTB ewangulidde mu penati ku ggoolo 3-2.
Mu luzannya lwa Volleyball, ttiimu 8 zeziyiseewo okuzanya okuzanya lwa Quarter finals okuli Buganda Royal Institute yakuzanya Namulondo investment, Buganda Land Board, (BLB), yakuzanya Lubiri High school Mengo, Lubiri High school Buloba Campus yakuttunka ne Ggwanika lya Buganda sso nga Nkuluze yakuttunka ne K2 Telecom.
Mu mupiira gw’abawala ogw’okubaka Netball, omupiira wakati wa BHTB ne Lubiri High school teguwedde era gutaataganyizzamu akalulu kaabayiseewo nga gwegwokutandikirwako nga 30 November,2024.
Mu kusooka minister w’abavubuka n’ebyemizannyo mu Bwakabaka Bwa Buganda, Owek Robert Sserwanga Ssalongo, bweyabadde aggulawo empaka zino yakuutidde abakozi ba Kabaka okuzannya nga bakimanyi nti emizannyo gino gyamukwano nekigendererwa ekyokumanyagana sso sikwetusaako bulabe.
Ssenkulu wa Radio ya Kabaka eya CBS, Omukungu Micheal Kawooya Mwebe, era ssentebe w’olukiiko lwa ba ssenkulu olw’okuntikko olwateeseteese emizannyo omwaka guno, awabudde nti essira lyakuteekebwa ku mizannyo egitaba abakozi awamu ejisukka ku gino egyokuvuganya gokka.
Agambye nti empaka z’emizannyo omuli okuddusa ejji ku jjiiko, emisinde gyakafubutuko n’egyokugaba akati, okuddukira mu kkutiya, okukola dduyiro wokumakya, abakozi okubaawo mu mpaka zino nebirala byebigenda okusinga okusakira ebitongole obubonero.
Ssentebe w’akakiiko akaatekebwawo okuteekateeka emizannyo ak’ebyekikugu Ntambi James, agambye nti emizannyo giwedde mu mirembe nga tewali afunye buvune bw’amaanyi.
Bisakiddwa: Ddungu Davis
