Ekeleziya mu Uganda ezzeemu okuziika omulambo gw’eyaliko Ssaabasumba w’e Ssaza ekkulu erya Kampala Joseph Kiwanuka Nakabaale mu Lutikko e Lubaga.
Entaana mwaziikiddwa eyooyooteddwa Kkampuni enziisi eya Uganda Funeral Services eyeeyama okuyooyoota n’okuddaabiriza ebiggya n’entaana z’abasumba abaziikibwa munda mu Lutikko e Lubaga n’ebweru waayo.
Nga 22 February,2026 lwejigenda okuwera emyaka 60, bukyanga eyaliko Ssaabasumba ow’essaza ekkulu erya Lubaga eryafuuka erya Kampala, Archbishop Joseph Kiwanuka Nakabaale ava mu bulamu bwensi eno.
Mu nteekateeka ey’okujaguza emyaka 100 egya Lutikko ya Lubaga, ebimu ku byalina okuzzibwa obuggya, bye biggya by’abaali ba Ssaabasumba b’essaza ekkulu erya Kampala, n’okuddaabiriza ebiggya bya bannaddiini abalala abagalamidde ku lutikko, nga kwotadde n’okussaawo entaana endala abo abalala abaliba bavudde mu bulamu bwensi eno mwebanaziikibwa.
Mu nteekateeka eno, ebiggya bya Ssaabasumba Kiwanuka nabyo byasimulwa nebiddamu okuyooyootebwa.
Ssaabasumba ow’essaza ekkulu erya Kampala aliko kati Paul Ssemogerere, yakulembeddrmu ekitambiro kya missa, ku mukolo gw’okuddamu okuziika eyali Ssaabasumba Joseph Kiwanuka Nakabaale.
ArchiBishop Joseph Kiwanuka Nakabaale, yazaalibwa nga 25 June,1899.
Yafuna obusaserdooti nga 26 May , 1929.
Mu 1939, yalondebwa okubeera omusumba, era nga ye musaserdooti eyasooka okulondebwa okubeera omusumba ku lukalu lwa Africa .
Obuweereeza bwe obwasookera ddala ng’omusumba , yabukolera mu ssaza rya Masaka , oluvannyuma mu 1960 yalondebwa okubeera Ssaabasumba ow’e Ssaza ekkulu erya Lubaga nga bweryaali liyitibwa mu biseera ebyo, oluvannyuma eryafuuka erya Kampala.
Ssaabasumba Joseph Kiwanuka yadda mu bigere bya ArchiBishop Louis Joseph Cabana.
Ssaabasumba Joseph Kiwanuka Nakabaale ye muddugavu eyasooka okufuuka Ssaabasnmba, yafa nga 22 February, 1966, Omukama lweyamuyita ku myaka 66 egy’obukulu.
Bisakiddwa: Ssekajiija Augustus
