Ebbeyi y’amafuta erinnya buli lunaku n’omuwendo gw’abasaabaze omutono ogukkirizibwa okusaabazibwa mu bus, ba nnyini bus bagamba nti bibawalirizza okulinnyisa ebisale by’entambula okutandika olunaku lw’enkya olw’okuna.
Bannyini Bus mu Uganda abegattira mu kibiina ki United Bus Owners Association ltd nga bakulembeddwamu ssentebe wabwe Solomon Nsimire, bagamba nti tebayinza kusigala ku bisale bye bimu ng’amafuta galinnya, ate nga tebalabawo ssuubi lyonna kuva mu gavumenti okukoma ku bbeeyi y’amafuta eyekanama okuva ku ntandikwa y’omwezi oguwedde.
Mu kiseera kino ebbeeyi y’amafuta g’emmotoka peturooli ali wakati wa shs 4450 – 4900 buli liita okusinziira ku kitundu gy’ogaguze, ate Dizero ali wakati wa shs 3400 ne 3800/-.
Ezimu ku ngendo nga bwezigenda okusasulibwa okuva e Kampala: okugenda e Masaka osasula 20,000/-,
e Mbarara 40,000/-, Kabale 70,000/-, Kisoro 80,000/-, Jinja 20,000/-, Mbale 40,000/-, Bukedea 45,000/-.
Abava e Kampala okugenda mu bukiika kkono bw’eggwanga, Lira bakusasula 50,000/-, Gulu 50,000/-, Kitgum 65,000/-, Pader 75,000/- nengendo endala bwezityo zongeddwamu ebbeyi wakati wa shs 5000/- na 8000/-.
Wabula Winston Katushabe omukungu wa ministry evunaanyizibwa ku byentambula agambye nti balina okusooka okutuula ne bannyini bus nga tebanassa mu nkola bisale ebyo, obutanyigiriza basaabaze.
Agambye nti bannyini bus enfunda eziwera bakozesa embeera nebanyigiriza abantu, naawa eky’okulabirako eky’ennaku enkulu ne mu biseera by’omuggalo ogwaleetebwa Covid 19 abantu bwebaasalawo okuddako mu byalo okwetegula ebibuga,nebasasuzibwa ebisale ebyakubisibwamu emirundi ng’esatu.