Obwakabaka bwa Buganda butongozza empaka za Bannalulungi b’Obulambuzi eza 2024 n’Omulamwa ogugamba nti Eby’obulambuzi n’Emirembe.
Empaka zino zigendereddwamu okukubiriza abavubuka okwongera okutumbula Obuwangwa, ennono n’obutondebwensi.
Zitongozeddwa minister w’obuwangwa n’ennono , Amasiro ,Embiri n’Ebyokwerinda Owek Anthony Wamala ku mbuga enkulu Bulange Mengi.
Agambye nti Obwakabaka bwakugenda mu maaso n’okusoosowaza ebyobulambuzi, ng’abavubuka basaale mu kaweefube Ono.
Owek Wamala mungeri yeemu ategeezezza nti wadde ebyobulambuzi mu Uganda eyaawamu bikyaali wansiko, abakyaala bakyaakoze Kinene ku kubitumbula ,nga Obwakabaka bwa Buganda busaale mu ntekateeka Eno.
Ssenkulu w’Ekitongole ky’ebyobulambuzi mu Bwakabaka Omuk Albert Kasozi, agambye nti Empaka zino zikoze kinene mu kukyuusa embeera z’Abavubuka abawala, n’Okubawa amaanyi okulaga obusobozi bwaabwe mu bintu ebyenjawulo.
Abamu ku bavujjirizi b’Empaka za Nalulungi w’obulambuzi mu Buganda omuli UWEC Entebbe Zoo abakulembeddwamu Diana Kibuuka ne Scovia Musimenta , beebazizza Obwakabaka olw’entekateeka Eno, era nebeeyama okuwagira Empaka z’obwa Nalulungi zonna.
Kampuni ya Kaynela farms ewagidde Empaka z’obwa Nalulungi mu Buganda 2024 n’ensimbi Obukadde 63, era Peace Sserunjoji Omu ku batandisi ba Kaynela farms agambye kino kikoleddwa okutumbula eby’obulimi n’Obulunzi.
Empaka z’Obwa Nalulungi mu Buganda 2024 ziwagiddwa CBS, BBS Terefayina,Sams food industry ,Trinity trends abatunzi b’engoye zaabagole, Tooke snacks, Digi prints, Kushona designers ,Victory school of beauty, Orgonite energy EA ltd, Tem school of beauty nabalala bangi, era Nalulungi w’Omwaka guno wakusitukira mu Kapyaata wa mmotoka.
Bisakiddwa: Kato Denis
