Ministry evunanyizibwa ku by’enjigiriza n’ebyemizannyo ekungubagidde abadde omutandisi w’amasomero ga Hormisdallen, Ssaalongo Kizito Mukalazi, eyafudde nga 25 April,2026, olw’ettofaali lyatadde ku byenjigiriza by’eggwanga n’okuwa abantu emirimu.
Minister Omubeezi avunanyizibwa ku by’enjigiriza eby’amatendekero aga waggulu Owek. Dr. John Chrysostom Muyingo, agambye nti mu kiseera eky’okukola enkyukakyuka mu bisomesebwa okuva ku nsomesa enkadde okudda ku nsomesa empya eya New Carriculum, omugenzi yakola kinene mu kukwasizaako government.
Bannabyanjigiriza,abazadde,abayizi n’abantu abenjawulo bakungaanidde ku Ssomero lya Hormisdalen ettabi lye Gayaza, okusabira omwoyo gwe, n’okwebaza Katonda olw’ebirungi byakoledde eggwanga, n’okukuba eriiso evvannyuma ku mubiri gw’omugenzi.
Owek. JC Muyingo agambye nti omugenzi Mukalazi yayagala nnyo ebyenjigiriza, yayagala nnyo obwa Kabaka ne Ssaabasajja Kabaka ebbanga lyonna lyamumanyidde okuva mu mwaka gwa 1992.
Minister omubeezi owa Kampala Christopher Kabuye Kyofatogabye naye ayogedde ku mugenzi Mukalazi nga abadde omusajjaa ow’embala, ayambye abanaku era abadde mwetowaze awadde ekyokulabirako ekirunji eri abalala.
Okusaba kukulembeddwamu omusumba Bishop David Kiganda ow’ekanisa eya Christianity Focus Centre e Mengo – Kisenyi mu Kampala, era ajjukizza banna Uganda okwewala okwemalamu olw’ebintu by’ensi.
Bishop Kiganda agambye nti ensi tuyitamu mpite ng’abantu, era n’abajjukiza okwekwata ennyo omutonzi nti yekka y’agaba obulamu obutaggwaawo.
Omugenzi Ssaalongo Kizito Mukalazi ajja kuziikibwa ku Tuesday nga 28 April,2026 mu bitundu ebye Semuto mu ssaza lye Bulemeezi.
Bisakiddwa: Ddungu Davis
