Empaka z’a masomero ga senior ez’omupiira ogw’ebigere eza National Schools Championships, zeyongeddemu ebbugumu oluvannyuma lw’okusigalamu amasomero 16 gokka ku masomero 64 agetabyemu omugatte.
Empaka zino ziyindira ku ssomero lya Ngora High School.
Emipiira ku mutendera gwa ttiimu 32 gye gizanyiddwa era gye bigweredde nga amasomero 16 gegasigadde mu lwokaano.
Omutendera gwa ttiimu 16 gugenda kuzannyibwa enkya ku Sunday nga 11 May,2025, era Buddo SS egenda kuttunka ne Wisdom High School, Kibuli SS egenda kwambalagana ne Masaka SS, St Mary’s Kitende egenda kuzuzumba ne Blessed Sacrament Kimaanya ate nga Uganda Martyrs High School Lubaga egenda kuzannya ne Green Light Islamic SS.
St Julian High School egenda kuzannya ne Jinja Progressive Academy JIPRA, Kyadondo egenda kuzannya ne Kicwamba High School, Mentor SS ne Jinja Comprehessive ate nga Kawempe Muslim SS egenda kuzuzumba ne Bukedea Comprehensive School.
Abategesi b’empaka z’omwaka guno aba Ngora bawanduse bwe bakubiddwa bannantameggwa b’empaka z’omwaka oguwedde 2024 ezaali e Masaka aba St Julian High School Seeta goolo 3-1 eza peneti oluvanyuma lw’okulemagana 0-0.
Buddo SS ekubye Bugisu High School goolo 3-0, Kawempe Muslim SS ekubye Kisozi Seed SS goolo 4-0, Blessed Sacrament Kimaanya ekubye ekubye MUMSA High School goolo 1-0, Masaka SS ekubye Kabalega SS goolo 3-0, St Mary’s Kitende ekubye Bishop Combon goolo 3-0, Kibuli SS ekubye Buziga Islamic goolo 4-1 n’emipiira emirala.
Bisakiddwa: Isah Kimbugwe
