Abakukusa ebiragalalagala nebabiguza abalala bakusibwa emyaka 20 oba okutanzibwa engasi ya kawumbi ka shs kalamba okusinziira ku nnyingo ezimu eziyisiddwa mu tteeka eriwera okukozesa ebiragalalagala erya Narcotic Drugs and Psychotropic substance bill 2023.
Ebiralagalalagala ebyogerwako kuliko enjaga eyekika Kya Cannabis, amayirungi n’ebirala.
Parliament okuteeka ekibonerezo kino mu tteeka lino, esinzidde ku alipoota y’akakiiko kaayo akalondoola ensonga zebyokwerinda mu ggwanga eyavudde mu kwekeneenya ebbago lino, eyasembye nti ebiragalalagala okuli amayirungi n’enjaga eyekika kya Cannabis ewerebwe mu ggwanga ,okugyako eyo yokka abakugu gyebakozesa mu ddagala.
Akakiiko ka parliament kabuulidde parliament nti ebiragalagala bituusiza bannansi bangi ku bulabe obwamaanyi, naddala abavubuka bibafudde ebitagasa.
Wabula omubaka wa Butambala Mohammed Muwanga Kivumbi alabudde babaka banne nti bagende mpola ku nsonga yokuwera amayirungi, kubanga bannansi bangi kwebayimiridde okuyimirizaawo obulamu olw’ensimbi zebagafunamu.
District y’e Butambala yeemu ku bitundu ebisinga okulimwamu amayirungi.
Omubaka omukyala owa district ye Butambala Aisha Kabanda yewuunyiza ekigendererwa ekiri emabega wokuwera amayirungi bannansi bangi kwebayimirizza enfuna yabwe, nga tebateereddewo mirimu mirala gyakukola.
Gyebuvuddeko kooti yali yasazaamu etteeka lino eriwera ebiragalalagala, ng’egamba nti omuwendo gw’ababaka abaali bayisa etteeka lye limu nti gwali teguwera.#