Akalippagano k’ebidduka akakutte ebitundu by’e Mpigi okumala ebbanga erisoba mu ssaawa 15, police egamba nti kavudde ku bagkba ba mmotoka abavugisa ekimama nga tebagoberera mateeka ga ku nguudo.
Abantu ababadde bayitidde e Mpigi nga boolekera oluguudo lw’e Masaka n’okweyongerayo, n’abalala ababadde badde ku lwe Butambala-Gomba- Ssembabule basuze ku makubo.
Ebidduka ebimu bituuse ekiseera nebizikira olwa bannyini byo otulo okubatwala ng’emmotoka zirimu amataala, olwo nezigwako omuliro n’amafuta.
Obudde bwebukedde police etandise okulambika ebidduka ebibadde bikyasobola okutambula okukozesa amakubo amalala, wadde ab’ebidduka ebamu babadde batyayo nga batyo okuseerererayo, nga nabandi batya okubulirayo.
Ministry y’ebyentambula n’enguudo efulumizza ekiwandiiko, ekirambika abagoba b’ebidduka ku nguudo endala zebasobola okukozesa okuli
Mpigi—Kasanje—Nakawuka okudda Entebbe/Kampala.
Mpigi— Kanoni — Gomba—Ssembabule Villamaria eri abo abagenda ku ludda lw’e Masaka.
Abalala baweereddwa amagezi okuva e Busega okuyita Mityana, bagwe e Gomba beyongereyo.
Abalala baweereddwa amagezi okudda ku luguudo lwe Kasanje bagguke e Nakiwogo ku Kidyeri boolekere e Bukakkata Masaka.
Omwogezi wa police ye bidduka mu ggwanga Micheal Kananura ategezeza cbs nti basubira embeera egenda kutereera singa abagoba b’ebidduka bagoberera okulambika okubaweereddwa.
Wabula wadde police egamba nti abagoba b’ebidduka bebaavuddeko obuzibu, kyokka n’abagoba ebidduka balumiriza police okusiba enguudo okumala essaawa ezisoba mu bbiri, president Yoweri Kaguta Museveni bweyabadde agenda okunoonya akalulu e Mpigi.
Bagamba nti emmotoka webaaziteeredde ate enkuba n’etonnya olwo embeera nejabagira.
Ssaabakunzi wa NRM nga yabadde ne President e Mpigi Rosemary Nasubuga Sseninde ategezeza cbs nti omukulembeze mu Mpigi yavuddemu mangu, kale abantu tebasaanye kumwekwasa.
Akalippagano kano kaakutte emmotoka mu njuyi zombi eziva ku ludda lw’e Kampala neziva ku lwe Masaka, era n’abakungu ba government bangi saako abawagizi abaabadde bava ku lukuηaana lwa president nabo basuze ku makubo.
Omwogezi wa maka g’obwa President Sander Walusiimbi ategezeza cbs nti President olwamalirizza kampeyini ze ku saawa ezirambikiddwa mu mateeka kumi nabbiri nadda e Kampala, era zagenze okuwera saawa emu n’ekitundu nga bataka mu kibuga, kale eby’abantu okusula mukkubo abadde tabimanyiiko.
Omwogezi wa Minitry y’ebyentambula Allan Ssempebwa naye obuzibu abutadde ku bagoba b’ebidduka bagambye nti bayitiridde okuvuga nga bwebagala ku nguudo.#
