Abantu abalala 30 okuli ba Inspector baamasomero mu district ezenjawulo, basimbiddwa mu kooti esookerwako eye Mengo, okuwerennemba n’emisango egyokugezaako okubbirira ebibuuzo.
Bano 30 kuliko omu nga ali ku ddaala lyakulira ebyokulondoola amasomero mu district, omu mutandisi wa ssomero mu district ye Kassanda, 5 bakulu baamasomero, sso nga abalala 23 basomesa okuva mu district okuli Kampala, Wakiso, Mityana, Mukono, Luweero, Kassanda, Masaka, ne Mubende.
Omusango ogubasomeddwa nti baaguzza mu kiseera abayizi ba P.7 webaakolera ebibuuzo bya bya PLE omwaka guno 2025.
Kigambibwa baasala ebibokisi ebyalimu ebibuuzo nebaggyamu empapula nebazikuba ebifaananyi olwo nebabisaasanya ku mitimbagano egyenjawulo ekimenya amateeka g’ekitongole ekivunanyizibwa ku bibuuzo ekya Uneb.
Ku bano 30 abasimbiddwa mu kooti, kitegerekese nti 8 ku bbo baakuzibwa enkya mu kooti okwongera okuwoza era basindikiddwa ku alimanda e Luzira.
Kinajjukirwa nti ne nga 13 omwezi guno ogwa November, waliwo abantu abalala 9 abaasimbibwa mu kooti yeemu mu maaso g’omulamuzi, Justice Admas Byarugaba, nebavunanibwa emisango egyakuusa ku kubba ebibuuzo bya primary ebyakamalirizo.
Ku bano 9 era Kinajjukirwa nt 3 ku bbo bakkiriza emisango era bakukomezebwawo mu kooti basalirwe ebibonerezo ekibagwana.
Abalala 6 emisango baagyegaana era nebateekamu okusaba okuteebwa ku kakalu ka kooti ngokusaba okwo nakwo kwakudamu okuwulirwa enkya nga 26 November,2025.
Okusinziira ku Jennifer Kalule-Musamba, ayogerera ekitongole kya Uneb, ssinga omuntu gumukka mu vvi eteeka lya Uneb epya liragira okuliwa engassi ya bukadde 20 oba okusibwa emyaka wakati we 5 -10, oba ebibonerezo byombi okukolebwa okusinziira ku mulamuzi nga bwaba alabye.
Bisakiddwa: Ddungu Davis
