Ebitongole by’okwerinda nga bikulembeddwamu ekitongole kya police ekinoonyereza ku misango ekya CID baaIzza amaka g’abadde sipiika wa Parliament eye 11 Annet Anita Among agasangibwa e Nakasero ku Macknoni road mu Kampala, mu nteekateeka egenda mu maaso ey’okumunoonyerezaako nti yenyigira mu bulyake n’obukenuzi.
Ebitongole bino kubaddeko ekya CID, Egye lya UPDF, JAT, ekitongole ekikettera Munda mu ggwanga ki ISO, ki CMI.
Kigambibwa nti abakuuma ddembe bano okusalako amaka ga speaker wa Parliament Annet Anita Among, kivudde ku bigambibwa nti yenyigira mu bulyake, obukenuzi saako okuddiibuuda ensimbi za Parliament mu ngeri y’okwegyalabya.
Kigambibwa nti abadde yakaguka n’emmotoka ekika kya RollsRoyce ebalirirwamu obuwumbi bwa shs 3.5.
Ab’ebyokwerinda basoose kusalako ekkubo eriyita ku nnyumba ya Sipiika Annet Anita Among, olwo ne bayingira munda ne batandika okufuuza amaka ge.
Wabula tekinategerekeka biki abakuuma ddembe byebayinza okuba nga bazudde mu maka ga sipiika, naye waliwo abakuuma ddembe abalabiddwako nga bafulumayo n’ebibokisi ebiddugavu nebabiteeka mu mmotoka, wabula ebibaddemu tebinategeerekeka.
Bannamawulire tebakiriziddwa kuyingira munda mu maka ga Sipiika, era obwedda basiinzira ku kizimbe kya Twed tower okufuna ebigenda maaso.
Tekitegereekese oba nga Annet Anita Among abaddemu munda mu maka ge, abakuuma ddembe webagafuulizza amaka gano, wadde ng’abakuumi abamu babadde balengerwa ku gate ye.
Kigambibwa nti mu nsisinkano Among gyeyabaddemu ne President Museveni mu maka g’obwa President Entebbe, yasabiddwa okuva mulwokako lw’obwa Sipiika, oluvanyuma lwa vulugu ayogerwako nti abadde mungi mu kisanja kye, mbu wabula yandiba nga yabadde aziimudde ekiragiro kya mukama we.
Bino webijidde nga enkalu ku kifo kyobwa Sipiika wa parliament eye 12 zikyagenda maaso.
Omudduumizi wa UPDF era mutabani wa President, nga ye Gen Muhoozi Kainerugaba yagambye nti agenda kuwagira omubaka wa Budama South county Jacob Oboth Oboth ku bwa Sipiika, wadde ng’ekisinde kye ekya PLU kyali kyalangirida dda nga bwekyali emabega wa Annet Anita Among, ekyayongedde akasatiiro ku kifo kino.
Wabula waayise mbale, PLU neerangirira nti eby’okuwagira Among ebivuddemu.
Kigambibwa nti basirikale abakuuma ku Parliament nabo baakuyitibwa ku kitebe kya bambega e Kibuli okubaako byebanyonyola, omuli n’omuteesitesi omukulu owa Parliament Adolf Kasaija Mwesigye.
CBS eyigeddeko n’omwogezi w’eggye erikuuma President erya SFC Jimmy Omara, naagamba nti nga bbo aba SFC tebalina kyebamanyi ku kikwekweto kino eky’ikufuuza amaga ga Annet Anitah Among.
Police ebadde tenafunika kubaako kyennyonyola ku nsonga zino.
Kalisoliso wa government naye yalangiridde yatandise okunoonyereza ku by’obuggagga bw’abadde Sipiika wa Parliament, oluvanyuma lw’okufuna ebbaluwa okuva mu bamwoyo gwa ggwanga nti anoonyereze ku Among, ku nsonga y’okubeera mmo mu kukwenyigira mu bulyake n’obukenuzi.#
