Ababbi b’emmwanyi mu district ye Bukomansimbi boongedde okutuuza obufoofofo bannyinizo n’abebyokwerinda tebataliza zengedde naanto.
Ababbi b’emmwanyi baziwulula emisana n’ekiro.
Amyuka RDC we Bukomansimbi Ssalongo Kalema Pax agambye nti bafunye okwemulugunya kungi okuva mu balimi b’emmwaanyi, nga nabamu kati nabo baasalawo kuzinoga nga zikyali nto ababbi baleme kuzibasooka ekyolekedde okutattana akatale k’emmwanyi.
Kalema agambye nti bataddewo abasirikale abakaseera bagire nga balawuna ebyalo ebiriko emmwanyi, wabula nategeeza nti ekyenkomeredde kisuubirwa kuva mu lukiiko olugenda okutuuzibwa mu Bukomansimbi Central okusalawo ekiddako, oba okugira nga baggalawo akatale k’okusuubula emmwanyi mu kitundu ekyo.
Olukiiko lwakwetabwamu abalimi, abasuubuzi, abazisunsula, ab’ebyokwerinda, abakulu okuva mu kitongole ky’emmwanyi ekya Uganda Coffee Development Authority n’abalala.
Bisakiddwa: Mubarak Ssebuufu Junior