Ekikangabwa n’entiisa bibuutikidde abatuuze be Nabyewanga-Lutukuma mu gombolola ye Kingo mu district y’e Lwengo, abaana 2 bwebajjiiridde mu nnyumba mu kiro ekikeesezza olwaleero nga 28 March,2025.
Nnyina w’abaana abadde abalese mu nnyumba bokka, ng’atwalidde taata wabwe mmere abadde asula mu nnyumba endala ku kyalo kye kimu.
Kigambibwa nti abafumbo bano baali baafunamu obutakkaanya nebasalawo okweyawula omwami n’agenda asula ewalala, naye ng’omukyala alina okumutwalira emmere olw’okuba ng’alina ekirwadde ekibadde kimugwiira.
Mu kiseera kino abatuuze naye babadde bamusondera nsimbi addeyo ewabwe e Kabale, ate enjega eno wegwiiriddewo.
Akataala ka munakutadooba kateeberezebwa okuba nga kekakutte omuliro negwokya ennyumba omufiiridde abaana 2 okuli ow’emyaka 2 n’owe 4, omukulu ow’emyaka 5 asimattuse.
Police ye Nkoni ezze neyetegereza ebibaddewo, n’okukola okunoonyereza okusingawo.
Bisakiddwa: Tumusange Kayinja
