Abasirikale 8 okuli abapolice 5 n’abakampuni y’obwannanyini 3 ababadde bakuuma bank enkulu eya Uganda ekitebe ekikulu mu Kampala, basimbiddwa mu kooti ya Buganda road nebasomerwa emisanvu gy’okulagajjalira emirimu ekyaviiriddeko abazigu okwesogga bank nebabbamu computer 7.
Abasirikale ba police abavunaaniddwa kuliko Sgt Amone Joseph, Pc Ouma Wilson, Pc Omach Thomas, Pc Mungusho Shafic, ne Pc Oryono Brian.
Abalala abavunaaniddwa bakuumi okuva mu kampuni y’obwannanyini eya Ultimate Security ltd okuli Onduri Alex, Orache Solomon, saako Ocen Morish owa Saracen Uganda Limited.
Omuwaabi wa government Allan Mucunguzi ategeezezza kooti nti nga 04 May,2026 ababbi baamenya nebayingira mu kitebe kya bank enkulu eya Uganda, nebabbamu computer okwali ebiwandiiko bya bank ebiwera, era okunoonyereza ku musango gwonna kugenda mu maaso.
Omulamuzi Rophine Achayo, abavunaanibwa abasindise ku alimanda okutuusa nga May 29, 2026, lwebanaakomezebwawo mu kooti.
Ebyo nga biri bityo, Waliwo n’abavubuka abalala 2 police beyakutte nga bateeberezebwa okubba ebintu bya Bank of Uganda.
Bisakiddwa: Betty Zziwa
