Balubbira ba police bali ku muyiggo gw’abantu abali wakati wa 30 – 40 abaagudde mu mugga Nguse ku kyalo Kyaleni mu kabuga k’e Pachwa mu district y’e Masindi.
Omwogezi wa Police mu kitundu kya Albertine, Hakiiza Julius agambye nti baliko omuntu omu yekka yebaakannyululayo, nga kiteeberezebwa nti eryato lyabaddeko abantu abasoba mu 35.
Azuliddwa ye Byaruhanga Tumuhaise wa myaka 27 egy’obukulu, omutuuze ku kyalo Kyaleni mu district ye Masindi
Police egamba nti omuwendo omutufu ogw’abantu abatalabika tegumanyiddwa bulungi, olwokuba tewali lukalala lutongole lulambika bantu babadde ku lyato lino.
Kigambibwa nti eryato lyabasudde mu mazzi ku saawa nga biri ez’ekiro kya nga 28 April,2026.
Hakiiza Julius asabye abantu bonna abamanyi nti babadde nabantu ku lyato lino okugenda eri polie enkulu mu Kagadi, basobole okuyambibwa.
Agambye nti batandise n’okunoonyereza ekiyinza okuba nga kyekyaviiriddeko akabenje kano naye nga bateebereza nti okutikka akabindo okuli abantu n’ensawo z’amanda, okusaabala ekiro, n’embeera y’eryato kwekwavudde obuzibu.#
