Katikkiro wa Buganda Charles Peter Mayiga asabye abavubuka okwetoloola Uganda okwenyumiriza mu Buwangwa bwabwe n’Ennono, mu Kifo kyokulowooleza mu kulwanagana.
Abadde ayogerako eri abayizi abegattira ku kibiina kya Baganda Nkobazambogo ku ssettendekero wa Mbarara University of science and Technology.
Mu ngeri yeemu awadde abavubuka amagezi okwekkiririzaamu, n’okunywerera ku misomo, lwebanaasobola okutuukiriza obuvunaanyizibwa obubalinze.
Era abagambye nti baleme kubeera na bitabo byokka, wabula nti balina n’ikumanya Obuvvo n’Obuddo bwabwe, nga bweguli mu Nkobazambogo.
Minister wa gavumenti ez’ebitundu n’Okulambula kwa Kabaka Owek Joseph Kawuki, asabye Abavubuka okuteeka mu nkola ebiragiro by’embuga.
Amyuka Chancellor wa ssettendekero wa Mbarara University of science and Technology atwala Ebyenjigiriza, Prof Joseph Ngonzi, asabye wabeewo enkolagana eyenjawulo wakati w’Obwakabaka n’ebitundu ebirala, okugonjoola ebizibu ebisomooza abantu omuli obwavu, endwadde n’Obutamanya.
Ssentebe wa Baganda Nkobazambogo mu Mbarara University of science and Technology, Kamya Abbey Mulyanga, yeebazizza Obwakabaka olw’Omukwano gwebalaze, nebeeyama okulwanirira Nnamulondo.
Akulembera essaza lye Ankole Kigezi Owek Hajji Hassan Mutaasa Kafeero yeebazizza Obukulembeze bwa Nkobazambogo, olwokuluηamya Obulungi Abavubuka.
Bisakiddwa: Kato Denis
