Katikkiro Charles Peter Mayiga asabye abavubuka okwewala okusiiwuka empisa nga bali ku mikolo gya Buganda ng’okwanjula, ne mu bitundu ebirala gyebabeera.
Obubaka buno abutisse Omukubiriza w’Olukiiko lwa Buganda Owek Patrick Luwaga Mugumbule mu kutikkula ebirabo ebivudde mu bibiina by’abavubuka mu Buganda, olw’okujaguza amazaalibwa ga Kabaka ag’emyaka 71 egy’obukulu.
Omukolo gubadde mu Lubiri e Mmengo.
Minister w’Abavubuka, Eby’emizannyo n’Ebitone Owek Ssaalongo Robert Sserwanga asabye abavubuka okwekuuma kubanga omulamu y’akola ebigasa Buganda.
Abavubuka bakulembeddwa Sentebe waabwe munnamateeka Derick Kavuma.
Baleese embuzi nningi ddala, enkoko, amatooke, ebibala, endokwa z’emmwanyi, nebirala bingi.
