Olusirika lw’abakulembeze ba Buganda olw’omwaka 2026 luyindira ku Muteesa I Royal University e Kakeeka Mengo.
Essira ly’omwaka guno liteekeddwa ku nteekateeka eya ‘Situla omutindo’, eyatongozebwa Katikkiro wa Buganda Charles Peter Mayiga bweyali mu ssaza Buvuma.
Emiramwa kwetambulira kwekusitula omutindo mu bulimi n’obulunzi, eby’enjigiriza, eby’obulamu, obusuubuzi, embeera z’Amaka, okutumbula ebitone mu bavubuka, na buli muntu okusitula omutindo mu buli kyakola.
Mu nteekateeka eno Obwakabaka bwa Buganda busabye abakulembeze ku mitendera egyenjawulo okusoosowaza Okussa Omutindo ku byebakola, mu lugendo lw’Okubuzza ku ntikko.
Olusirika luno lugenda kumala ennaku 2, nga lwetabiddwamu ba minister ba Ssabasajja, Abaami b’Amasaza, Abakiise mu Lukiiko lwa Buganda, abakiise ku nkiiko ezikulira ebitongole, kko ne ba Ssenkulu b’Ebitongole by’Obwakabaka.
Katikkiro wa Buganda Charles Peter Mayiga bw’abadde aluggulawo yebazizza abakulembeze b’Obwakabaka olwebyo ebituukiddwako, era naabasaba obutakoowa.
Katikkiro era asabye abavubuka mu Bwakabaka okumanya essuubi Kabaka lyabalinamu nti lya maanyi, naabawa gaabuwa beeyise bulungi, babeere bakozi, ate bafe nnyo ku bulamu bwabwe, beewale okulwala endwadde ezeewalika, olwo bakulaakulanye Buganda ne Uganda.
Omumyuuka owookubiri owa Katikkiro era Omuwanika w’Obwakabaka Owek Past District Govnor Robert Wagwa Nsibirwa, ategeezezza abakiise mu lusirika luno ,nti Nnamutayiika w’Obwakabaka 2023-2028 eyakatambulako emyaka ebiri n’ekitundu yakatuukirizibwako ebitundu 80%.
Nnamutaayika eno yabangibwa ku miramwa esatu okuli Okutaasa, Okukuuma n’Okukulaakulanya Eby’obugagga, Okusitula embeera z’Abantu n’Obwetengereze mu Byenfuna.
Owek Nsibirwa ategeezezza nti mu Nnamutayiika mulimu Amakatala agataassibwamu mu ntandikwa ng’abagibwa, wabula gakoleddwa era nga galiko wegatadde Obwakabaka, mu lugendo lwabwo olwokudda ku ntikko.
Muno mwemuli okutandikawo amasomero g’abaana abato aga Nursery agawera 20, ssemadduuka w’ebyobulimi mu ssaza Buweekula n’ebirala.#
