Abayizi abatuula ebigezo bya PLE omwaka ogwayita 2025,baasinze kuyita ssomo ly’olungereza/oluzungu, nekudako essomo lya Science ne Math ate nga essomo lya SST lyebasinze okukola obubi, era nga wabaddewo okweyongerako mu kukola obulungi oluzungu okukira ku mwaka ogwa 2024.
Dan Nockrach Odongo, ssenkulu wa UNEB agambye nti abaana abalenzi bakize ku bawala mu kuyita ebibuuzo, wadde abawala bebasinze nate mu kukola obulungi essomo ly’oluzungu ssonga abalenzi babakize mu masomo amalala gonna.
Alipoota ya UNEB ku bibuuzo, era nti ku bayizi abaatula ebibuuzo abaali emitwalo 807,313, emitwalo 91,990 bayitidde mu daala lisooka, emitwalo 388,296 bayitidde mu ddaala lyakubiri, emitwalo 165,226 baayitidde mu ddaala lyakusatu, ssonga abayitidde mu ddaala eryokuna bali emitwalo 84,724.
Abayizi emitwalo 77,080 ebibuuzo baabigudde, nga bano bakola ebitundu 10% ku muwendo gw’abayizi abaatula, ate abalala ekitundu 1.3% abakola omugatte gwabayizi omutwalo10,570 bbo wadde beewandiisa naye tebaasobola kubituula.
Ekitongole ekivunaanyizibwa ku bibuuzo eby’akamalirizo mu ggwanga ekya Uganda National Examinations Board UNEB, kirumirizza nti abasomesa obutaagala kwongera kubaako bipya byebayiga ebyongera ku nsomesa y’abayizi, nti yeviiriddeko abayizi okukola obubi ebigezo by’ekibiina ekyomusanvu.
Dan Odongo, ssenkulu wa UNEB agambye nti abamu ku basomesa naddala abasomesa SST nebyediini, tebafuddeyo kukola kibasuubirwamu, omuli okunoonyereza n’okusomesa abayizi mu ngeri ebaagazisa amasomo ago.
Mungeri yeemu ne minister w’ebyenjigiriza n’emizanyo, era mukyala w’omukulembeze w’eggwanga, Janet Kataaha Museveni, bw’abadde afulumya ebibuuzo bino mu maka goobwa president e Nakasero agambye nti kyenyamiza okulaba nti wakyaliwo abantu abenyigira mu muze gw’okubba ebibuuzo, era naalagira ab’ekikugu okunoonyereza ku kiviirako omuze guno okusigala nga gukula.
Janet Museveni era asabye abasomesa okwongera amanyi mu kubangula abayizi bategeere ebibasomesebwa basobole okugonjoola ebizibu byebasiηaana mu bulamu.
Minister Janet Museveni awadde amagezi eri abasomesa abataaga kwongera kuyiga ebikwata ku nsomesa empya, basaanye bawummule obusomesa.
