Eyaliko nakinku mu kucanga endiba mu mpaka z’Amasaza ga Buganda ez’omupiira ogw’ebigere Ibrahim Kasule, yegasse ku club ya Connecticut United egucangira mu liigi y’ekibinja eky’okubiri mu America ekya Major League Soccer Next Pro.
Agenzeyo ku bwazike okumalako omwaka guno 2026, avudde mu club ya New York Red Bulls ll ey’ekibinja kye kimu.
Ibrahim Kasule alese azannyidde New York Red Bulls ll emipiira 64 mu season 3, ateebeddemu goolo 28 n’emikisa egivamu goolo 11.
Ibrahim Kasule yegatta ku New York Red Bulls ll mu 2023 ng’ava mu club ya Wakiso Giants eya Uganda Premier League.
Omupiira gwe gweyasooka okuzanyira New York Redbulls II gwaliwo nga 09 April, 2023 nga New York Red Bulls ll yali ettunka ne Columbas Crew II.
Kasule yazannyirako ttiimu y’eggwanga eya Uganda Cranes emipiira 2, nga yasooka kugizanyira ng’ettunka ne Algeria mu October wa 2023 mu mpaka za FIFA World Cup Qualifiers.
Steven Sserwadda ye munnauganda omulala azannyira mu club ya New York Red Bulls ll.
Ibrahim Kasule ettuttumu yalifunira mu mpaka za Masaza ga Buganda, nga yali azannyira ttiimu y’essaza Buddu.
Bisakiddwa: Isah Kimbugwe
