Ekibiina ekiddukanya omupiira ku ssemazinga Africa ekya CAF, kironze bannauganda 06 ku buvunanyizibwa obwenjawulo mu mpaka za Africa Cup of Nations, ezigenda okubeerawo okuva nga 21 December,2025 okutuuka nga 18 January omwezi ogujja ogwa January 2026 e Morocco.
Shamirah Nabadda yakakasibwa dda ku baddiifiri abagenda okulamula mu mpaka zino.
Lelilah Nankya agenda kuvunanyizibwa ku bagenyi, Dick Okello ne Hajji Jamil Ssewanyana bagenda kuvunanyizibwa ku byakwerinda ku bisaawe ebyenjawulo.
Richard Ssemanda ne Sadam Bulega bagenda kuvunanyizibwa ku bagenyi n’okutimba bannamukago b’empaka zino.
Abategesi aba Morocco be bagenda okuggulawo empaka zino nga battunka ne Comoros.
Uganda Cranes yakuggulawo emipiira gyayo nga 23 December, ng’ettunka ne Tunisia.
Uganda Cranes eri mu kibinja C ne Nigeria, Tunisia ne Tanzania.
Bisakiddwa: Isah Kimbugwe
