Katikkiro Charles Peter Mayiga asisinkanye Abataka Abakulu b’Obusolya ne ba Katikkiro babwe mu nsisinkano yabwe eya buli mwaka, akkaatirizza ensonga 6 Ssaabasajja Kabaka zeyabalambika mu nkola y’emirimu.
Ensisinkano etudde mu Bulange e Mengo.
Katikkiro Mayiga asabye Abataka Abakulu b’Obusolya okunyiikirira ensonga eziyitimusa Ebika bisobole okuddamu omuggundu nga buli kyebakola kisimba ku kiruubirirwa eky’okuzza Buganda ku ntikko.
Abajjukiza ennyingo 6 Kabaka ze yabalambika nga 18 Mutunda,2025 mu lukiiko lw’Abataka olw’enjawulo era olwatuula mu Bulange e Mengo.
Ennyingo 6 ziizino Ssaabsajja zeyalambika Abataka Abakulu Ab’obusolya mu 2025;
1. Okwejjukanya ebyafaayo by’Obwakabaka
2. Okumanya nti Kabaka ye Ssaabataka era ye ky’Ekitikkiro ky’Obwakabaka
3. Okutumbula enkulaakulana mu Bika
4. Abataka okusomesa n’okulambika abaana babwe
5. Okuwagira abazzukulu abaliko eby’amaanyi bye bakoze
6. Okunyweza obukulembeze mu Bika, buli Kika kibeere ne Katikkiro n’olukiiko olufuzi era banjulwenga eri Ssaabataka.
