President w’ekibiina kya National Unity Platform Robert Kyagulanyi Ssentamu Bobi wine agobye abantu bonna abamubadde okumpi abaava e Kampala nga bagenda bamuwerekera gy’akuba ankuηaana ng’agamba nti agudde mu lukwe lw’abebyokwerinda olw’okubakwata bonna baggulweko emisangosango.
Kyagulanyi Ssentamu bano okubalagira bonna okudda e Kampala kijidde mu kiseera ng’abantu be abawerako bazze bakwatibwa bukyanga atandiika kutalaaga ggwanga ng’anoonya akalulu k’obwa president 2025.
Ababadde bakasembayo okuyoolebwa babakwatidde Mbarara, nga kigambibwa nti bayonoona n’okubba ebintu bya police, n’abamu okusangibwa nga bambadde ebintu ebyefaananyiriza eby’amagye.
Kyagulanyi Ssentamu bwabade asimbula okugenda e Kanungu ne Rukungiri agambye nti ababadde basitudde okumwegattako abalagidde badde e Kampala bataase obulamu n’okukola emirimu emirala.
Agambye nti ekibiina kyakwatide bendera ekya NUP kyabanzeewo enkola endala, nga kati buli kitundu kyagendamu abantu baayo bebajjanga okukola obukuumi ku mukulembeze wabwe
Kyagulanyi agambye nti tebagenda kuyimiriza nkuηaana zabwe wadde nga abebyokwerinda buli lukya babateekako eryanyi , obutafananako n’abakulembeze balala abavuganya ku bwa president.
Ebyo nga biri bityo, Kyagulanyi asanze akaseera akazibu okuyingira district ye Rukungiri olw’abakuuma ddembe okumusuulira emisanvu
Ekisaawe kyabadde alina okukubamu olukuηaana olusooka nebakimulemesa nasindikibwa mu kyalo ekirala kyagambye, nti kibadde wala newabadde alina okukuba olukuηaana gyamaze kumpi esaawa 4 nga tatuuka.
Kyagulanyi Ssentamu agambye nti embeera eno ey’okubasuulira emisanvu ebamalira obudde bungi mu luguudo.
Kyagulanyi bwatuuse mu district ye Rukungiri abaayo obwedda bamubanja alwane nga bwasobola Besigye ayimbulwe naye addemu afune eddembe lye.
Kyagulanyi agambye nti abantu be Rukungiri singa bamulonda agenda kulwana abasibe bonna abaakwatibwa olw’ebyobufuzi bayimbulwe#
