Emizannyo gy’ebitongole by’Obwakabaka egy’omwaka guno 2025 jigyiddwako akawuuwo olwa leero nga 08 November, mu Lubiri e Mengo.
Emizanyo mingi egivuganyizibwako muli Omweso, ludo, Volley ball, okusika omugwa, omupiira ogw’okubaka, ogw’ebigere n’emirala.
.
Ttiimu z’ebitongole zonna zivuganyiza mu bibinja, eziyitawo zezigenda okuddamu okuzanya nga 22nd Omwezi guno gwe ogwa Museenene, okunonyaako omuwanguzi w`omwaka guno.
Buganda Land Board erwana kwediza kikopo ky’omupiira ogw’ebigere kye yawangula omwaka ogwaggwa 2024.
Mu mupiira ogw’ebigere CBS FM eri mu kibinja B ne Buganda Royal Institute, Nabagereka Development Foundation BUCADEF ne BICUL, era CBS egenda kuggulawo nga ettunka ne Buganda Royal Institute.
Omwaka oguwedde 2024 Buganda Land Board yakuba CBS FM goolo 2-1 ku final okuwangula ekikopo kino.
Emizannyo gigenderera okwongera okutondawo enkolagana mu bakozi ba Kabaka, okukola dduyiro okukuuma obulamu n’ensonga endala.
Minister w`Obwakabaka Ow’ebyobulamu, ebyenjigiriza ne Office ya Nnaabagereka Owek Cotilda Nakate Kikomeko, bwabadde aggulawo empaka zino ezebitongole by`Obwakabaka, afalaasidde abaweereza bonna mu Bwakabaka okweyambisa omukisa nga guno okuvumbula ebitone byabwe, okukola duyiiro wamu n`okwongera okumanyagana nebawereeza banabwe abalala.
Amyuka Ssenkulu wa ssetendekero w`Obwakabaka Owa Muteesa 1 Royal University Omukungu Professor Vincent Kakembo, nga bebategesi b’empaka z`omwaka guno, yeebazizza omutindo ogwoleseddwa mu mpaka z`omwaka guno.
Ssenkungu Paddy Kiganda omuwereeza Ku Ssetendekero wa Muteesa era nga ye Ssentebbe wempaka z’omwaka guno agambye nti empaka zitambudde bulungi, wabula nga wakyaliwo ensonga ezokyekenneenyezebwa akakiiko, olwo balangirire ttiimu ezigenda okuzannya omutendera oguddako.
Bisakiddwa: Isah Kimbugwe ne Musisi John
