Police ya Uganda efulumizza amannya ga bannakibina kya National Unity Platform NUP 10 abakwatiddwa mu bitundu bye Lira.
Mu kiro ekikeseza olwaleero nga 29 October,2025 police yazinzeeko wooteri, akwatidde ekibiina Kya NUP bendera ku bwa president Robert Kyagulanyi Sentamu Bobi Wine mweyasuze, n’ekwata abamu ku bakuumi be nabawagizi ba NUP ku bigambibwa nti balumbye abasirikale babwe.
Abakwatiddwa nga mukasera Kano bakuumibwa ku police enkulu e Lira, kuliko Lokolo Liberty, Waiswa Lasitoni,Katamba Steven, Ssembuusi Paul,Bukenya Ismail, Nakabuye Masitula, Nassozi Hope, Kamulegeya Regan, Saliman Kaggwa ne Lubega Arison
Omwogezi wa police mu ggwanga Rusooke Kituuma asinzidde mu lukuηaana lwa banamawulire ku Kitebe kya police e Naguru, nategeza nti abaakwatiddwa baagezezaako okusomooza abasirikale, baafumise emipiira gy’emmotoka ya police No. UBK 380Q ne banyaga n’ensawo y’omusirikale omwabadde engoye ze n’ebirala.
Police egambye nti bano babbye naamafuta ga police litres 20, saako okukola ebikolwa ebirala ku bakuuma ddembe ebitakirizibwa mu mateeka.
Rusooke agambye nti tebagenda kukkiriza mbeera eno kugenda mu maaso, era bakukwata bonna abakozi b’effujjo.
Rusooke Kituuma ategezeza nti abakwate bagguddwako emisango ebiri omuli ogw’obubbi n’okwonoona ebintu bya police, era bakutwalibwa mi kooti esaawa yonna.
Rusooke ategezeza nti balina emisango egiweerako gyebaggulawo edda ku police ezenjawulo egibadde gikolebwa bannakibina kya NUP, abatambula ne President wa NUP Robert Kyagulanyi Sentamu ng’anoonya akalulu k’obwa president aka2026.
Okusinziira ku police, nga 3 October,2025 akwatidde NUP bendera bweyali mu district ye Mayuge ba “foot soldier” be baalumya omusirikale, nga 8 omwezi gwe gumu Robert Kyagulanyi Sentamu bweyali e Kyankwanzi omu kuba foot soldier yakuba omusirikale ekikondde.
Mu mbeera yemu police egamba nti President wa NUP bweyali mu bitundu bye Busia, abasirikale babwe era basoomozebwa, sso nga 21 omwezi guno bweyali e Kakumiro ku kyalo Kisita yakuba olukuηaana mu kifo ekyali kitakaanyiziddwako ne police, gyebyagwera nga mmotoka ya police namba UP 7694 eyonooneddwa.
Ayogeera police Rusooke Kituuma asabye abakulembeze ba NUP okugamba ku bantu babwe okweddako.#
