Katikkiro wa Buganda Charles Peter Mayiga alambise Abavubuka ku mitendera gy’Obukulembeze gyonna okunyweeza Obumu mu kifo ky’Okwegulumiriza nga baweereddwa obukulembeze.
Abadde atongoza olukiiko oluggya olwa Nkobazambogo mu ggwanga lyonna ku mukolo ogubadde mu Bulange e Mengo.
Katikkiro agambye nti obumu mu bukulembeze bugatta kinene ku nkulaakulana y’Obwakabaka n’egGwanga lyonna okutwaliza awamu.
Owomumbuga alabudde Abavubuka Abalenzi n’Abawala ku kabaate akava mu bikolwa by’Obwamalaaya, byagambye nti bivudde ku bwa ssemugayaavu.
Olukiiko olutongozeddwa; Ssentebe ye Ssemujju Moses Mwanje okuva ku Makerere University, Omukubiriza ye Mutaasa Micheal wa Muteesa the first Royal University, Owamawulire ye Kisenyi Eddy, Ndagire Christine muwandiisi, Kyeyune Uthman wa Mateeka, Nakimuli Jovia mumyuka wa Ssentebe, Nakate Jackline mumyuka wa mukubiriza, Wannyana Alice w’abakyala, Matovu Denis wa baliko obulemu Naabalala.
Ssentebe w’abavubuka mu Buganda Derick Kavuma asabye banna Nkobazambogo okulwanyisa omuze gw’okukozesa ebiragalalagala ogususse mu Bavubuka ,ekintu ekyobulabe eri Buganda ey’enkya.
Abadde Ssentebe wa Nkobazambogo ow’e ggwanga lyonna Adriana Lubyayi asabye abavubuka okugoberera obubaka obutongole obuva e Mbuga mu kifo kyokuwuliriza abaseddekezi abeesomye okusaanyawo Obuganda nga bayita ku mitimbagano.
Ssentebe wa Nkobazambogo ow’e ggwanga lyonna omuggya Ssemujju Moses Mwanje yeyamye okukulembera banne obulungi, okwonegra okusitula ekifaananyi kya Nkobazambogo n’obuvunaanyizibwa obwakitondesaawo.
Bisakiddwa: Ssekajiija Augustus
