Abadde omuweereza ku Radio ya Ssaabasajja Kabaka CBS okumala emyaka 15 Jimmy Ssekabiito, aziikiddwa enkumi n’enkumi z’abantu ku kyalo Bukoto , mu Kimaanya Kabonera mu district ye Masaka mu Budde.
Jimmy Ssekabiito abadde munnamawulire wa CBS asaka amawulire.gonna agava mu ssaza Mawogola oli district ye Ssembabule.
Ssenkulu wa Radio CBS Omuk Michael Kawooya Mwebe , agambye nti okufa kw’Omulangira Ssekabiito kukosezza Radio ya Beene naddala mu kisaawe ky’Amawulire, olw’Okussa ekitiibwa mu mpeerezaaye ey’Amawulire, okukozesa olulimi oluganda mu mbeera esaanidde, era ng’abadde Musaale nnyo mu kulwanirira eddembe ly’Obuntu.
Omubaka akiikirira Nyendo Mukungwe Owek Mathias Mpuuga Nsamba, asaasidde Obwakabaka olw’okufiirwa omuweereza abadde n’Ensa , ate nga ayagala nnyo Kabakawe.
Omwaami wa Ssaabasajja amukulembererako essaza Buddu Pookino Jude Muleke, yebazizza Radio ya Beene CBS olw’Okuwa Omugenzi Ssekabiito Omukisa okuweereza Obwakabaka, kyokka naasaba bannamawulire okweyisa mu neeyisa ebaweesa ekitiibwa, n’Obuteryamu nkwe.
Mungeri yeemu Omwaami wa Kabaka akulembera essaza Mawogola Muteesa John Kankaka , ategeezezza nti Omugenzi Ssekabiito abadde Musaale mu kubunyisa Amawulire agava mu Ssaza Mawogola.
Akulira Oludda oluvuganya gavumenti Joel Ssenyonyi, agambye nti Ssekabiito tabadde na bukuusa mu mpeereza, ate nga abadde mukwaatampola.
Minister wa microfinance Hajji Kyeyune Haruna Kasolo, yebazizza Ssekabiito olw’obuweereza obutabaddeemu kyekubiira.
Rev Canon Fred. Herbert Matovu omuwanika w’Obulabirizi bwa West Buganda ku lw’Omulabirizi wa West Buganda Kitaffe mu Katonda Gaster Nsereko nga yakulembeddemu okusaba okw’okweebaza Katonda olw’Obulamu bwa Jimmy Ssekabiito, asabye abantu okugondera entekateeka za Katonda, kyokka naavumirira bannabyabufuzi abasussizza entalo, nebatalowooza ku biseera bya Uganda ebyomumaaso.
Omulangira Ssekabiito Anthony Trevor ku lwa Baana banne, yebazizza kitaabwe olw’Okubaagala ennyo ate naafuba okubasomesa, yadde ng’agenze tebannabaako webatuuse mu kusoma.
Namwandu Clare Nannyunja yeyanzizza Ssaabasajja Kabaka Ronald Muwenda Mutebi ii olw’Okusiima Omulangira aweerereza ku Radio ye, neyeebaza Obukulembeze bwa Radio CBS n’Abantu ba Kabaka ku buli mutendera.
Namwandu agambye nti omwamiwe abadde amaze ekiseera ng’atawaanyizibwa obulwadde bwa ssukaali, wabula ng’alipoota zebaafunye okuva mu ddwaliro e Mulago abaakebedde omulambo, baalaze nti omutima gwesibye, nti kubanga gwabadde guziimbye.
Okusiibula Jimmy Ssekabiito kwetabiddwaako Owek Bbaale Mugera,ababaka mu Lukiiko lw’eggwanga Olukulu,bannabyabufuzi ku mitendera egyenjawulo, Bannamawulire okuva ku mikutu gy’Amawulire egyenjawulo, Abasuubuzi, n’Abantu kinnoomu.
Bisakiddwa: Kato Denis
