Obwakabaka bwa Buganda nga bukolera wamu ne Rotary Club of Kampala busimbye ekibira kya Kabaka ku Makerere University, ng’emu ku nteekateeka y’okwagazisa abavubuka okukuuma obutonde bw’ensi.
Omumyuka ow`Okubiri owa Katikkiro era Omuwanika w`Obwakabaka Owek Rotarian Robert Waggwa Nsibirwa, asabye abantu bakabaka okwongera amaanyi mu kusimba emiti mu maka gaabwe okufuna omukka omulungi
Enteekateeka eno ekulembeddwamu Obwakabaka nab Rotary club ya Kampala egenderera okusimba emiti 3000 ku University eno.
Owek Waggwa Nsibirwa agamba nti kikulu nnyo okusimba emiti mu bifo ebitwetoolodde kulw’obulungi bw’obulamu bwaffe.
Wilson George Asiimwe akulembeddemu aba Rotary club Kampala of Central, agambye nti emiti gyebasimbye mubaddemu egyebibala, egigenderera okusobozesa abayizi okufuna ebibala okulwanyisa endwadde.
Dr Winnie Kabumbuli dean of Student Makerere University, nga yasomye obubaka bw’amyuka ssenkulu wa Ssetendekero ono, agambye nti kibadde kya kitiibwa Obwakabaka okusiima nebusimba ekibira kya Kabaka mu University yabwe.
Bisakiddwa : Musisi John
