Essomero lya Kibuli SS lisitukidde mu mpaka za masomero ga senior agali ku musingi gw’obusiramu eza UMEA Solidarity Games, era ewangudde emizannyo egisinze obungi.
Empaka zino zibadde ku ssomero lya Kawanda SS mu Wakiso, zetabyemu amasomero 48.
Kibuli SS ewangudde ebikopo 4 mu muzannyo gwa Table Tennis mu miteeko gyonna, n’ewangula mu Badminton owa balenzi mu muteeko ogwa wamu, mu Handball ow’a bawala ekutte ekifo kyakubiri, ate nga mu mupiira ogw’ebigere mu balenzi ekutte ekifo kyakusatu.
Kawempe Muslim SS yesinze mu mupiira ogw’ebigere ogwabalenzi bw’ekubye Madinah Islamic SS goolo 1-0, ate nga abategesi aba Kawanda SS be bawangudde mu mupiira ogw’ebigere ogwabawala.
Ngando SS yeddiza ekikopo eky’okubaka bw’ekubye Kawanda SS obugoba 25-20, Kakungulu Memorial yewangudde mu Handball ow’abalenzi ate Kawanda SS n’ewangula mu Handball w’abawala.
Kinaawa High School Mugongo yewangudde mu Volleyball owa bawala ate Ubuntu Hill School n’ewangula mu Volleyball ow’abalenzi.
Bwabadde aggalawo empaka zino, Omulangira Dr Khassim Nakibinge Kakungulu, akubiriza abayizi okukozesanga empaka zino okwongera okumanya eddiini yabwe ey’obusiramu, ate n’okwongera okukuuma obumu n’empisa okunnyikiza omulamwa gw’empaka zino.
Ssentebe w’olukiiko olutegeka empaka zino, Hajji Twahil Kitezaala, agambye nti omulamwa gw’empaka z’omwaka guno gubadde gwakukuuma butondebwansi era basimbye emiti egiwerako mu kitundu ekyo mweziyindidde.
Empaka zino zaatandika mu 1998 nga ziyitibwa UMEA Games wabula mu 2013 ne zifuuka UMEA Solidarity Games, era zigendererwamu okwongera okutumbula enkolagana mu masomero agali ku musingi gw’obusiraamu.
Bisakiddwa: Issah Kimbugwe
