Bannabulemeezi bali mu ketalo ka kwaniriza Ssaabasajja Kabaka – Embwa esisinkana Engo okuggulawo omupiira gw’ebika 2022

Ssabasajja Kabaka Ronald Muwenda Mutebi II asiimye okulabikako eri Obuganda, aggulewo empaka z’emipiira gy’ebika by’Abaganda ez’Omwaka guno 2022, mu ssazalye Bulemeezi.

Bazzukulu ba Mutasingwa abeddira Embwa bagenda kuttunka ne bazzukulu ba Mutesaasira ab’Engo mu mupiira ogwebigere n’Okubaka ku lwomukaaga luno nga 11 June mu kisaawe kye Kasana mu Bulemeezi.

Bannabulemeezi baatandise dda okusindogomya embuutu balinze Mutanda

Omumyuka asooka owa Katikkiro wa Buganda Owek Dr Haji Twaha Kigongo Kawaase ,asabye abantu ba Beene okumanya nti okusasaana kw’akawuka ka Covid 19 kukyaliwo, n’abasaba obutalekaayo bukookolo mabega nga bagenda okuwagira omupiira.

Kangaawo Ronald Mulondo ng’ayaniriza Hajji Magala Sulaiman ssentebe w’omupiira gw’ebika asiibye alambula enteekateeka ezikoleddwa mu Bulemeezi

Ssentebe w’Olukiiko oluteesiteesi olw’empaka z’amasaza Katambala Haji Sulaiman Magala agambye buli kyetaagisa okuggulawo empaka zino kikoleddwa, era nga n’ekisaawe kye Kasana Kiri mu mbeera nnungi ddala.

Omwami wa kabaka ow’eggombolola ya Mumyuka Nsege Butuntumula omuli emikolo gino, Ali Musa Kirumira, asabye abalyannaka okujjumbira enteekateeka y’okuleeta amakula okulaga Omuteregga essanyu.

Abayizi ba Luweero girls primary school basiibye balongoosa ekisaawe kye Kasana ewagenda okubeera omupiira gw’ Engo n’embwa

Ensitaano wakati w’Engo n’Embwa egenda kutandika kusaawa 9 ez’olweggulo,naye nga wakusookawo omupiira ogw’okubaka.

Okuyingira mu kisaawe e Kasana okulaba omupiira kwa shs 5000.

Bisakiddwa: Issah Kimbugwe