Abantu 46 bafiiridde mu kabenje k’emmotoka akagudde ku kyalo Kitaleeba mu district ye Kiryandoongo okumpi ne Asili Farm, ku luguudo oluva e Kampala okudda e Ggulu, mu kiro ekikeesezza olwa leero nga 22 October,2025.
Emmotoka 4 zitomereganye okubadde bus 2 n’endala zaabuyonjo.
Kuliko isuzu bus eya kampuni ya Nile Star Coach UBF 614X, CGO 5132AB 07 Toyota surf eriko enamba z’e Congo, UBK 647C Tata Loole ne UAM 045V Isuzu Bus eya kampuni ya Planet.
Alipoota ya police etegeezezza nti akabenje kavudde ku bagoba ba bus ebbiri ng’emu ebadde eva Kampala ng’endala eva Gulu, bwebalowoolezza okumu okuyisa emmotoka ezibabadde mu maaso, olwo nezaambalagana bwenyi ku bwenyi, nezizingiramu n’emmotoka zebabadde bayisa.
Police etuuse mangu neddusa ababadde bakyali abalamu mu ddwaliro lye Kiryandoongo.
Omwogezi wa police y’ebidduka Kananura Micheal, agambye nti alipoota eziva mu mawaliro abantu gyebaddusiddwa zikakasizza nti abantu 17 abasoose okulowozeebwa nti nabo bafudde, babadde tebanafa wabula ng’embeera gyebalimu yetaaga essaala.
Ebyo nga bikyali bityo, ministry yeebyentambula n’enguudo, etandise okunoonyereza okwenjawulo ku kivuddeko akabenje kano, omufiridde abantu abangi bwebati,era okusinziira ku kiwandiiko kya ministry eno, baliko ekibinja kyabakugu ekisindikiddwa okwetegereza embeera nga bakolagana ne police ku nsonga eno.
Mu mbeera yeemu omukulembeze w’eggwanga Gen Yoweri Kaguta Tibuhaburwa Museveni alagidde avunanyizibwa ku nzirukanya y’emirimu mu maka g’obwa president, okuwaayo amabuga ga bukadde bwa shs 5 eri abenju z’abafiriddwa abaabwe, naakakadde kamu eri abakoseddwa.
Mu bubaka bwa president Museveni, azeemu okukuutira abakozesa amakubo okuba abeegendereza mu nkozesa yaago okwewala obubenje nga buno.
Mungeri yeemu n’ekitongole ekiduukirira abali mu bwetaavu ekya Uganda Red cross Society, kiriko ekimbinja kyabakugu baakyo bekisindese okwongera okukwasizaako embeera n’okutaasa abakyalina obulamu.
Amyuka omwogezi wa Uganda Redcross Society John Cliff Wamala, agambye nti balina n’ekibinja kyebatadde ku bwerinde okuyitibwa kiyambeko, ssinga wanaabawo obwetaavu obulala.
Wamala agambye nti ssinga abantu tebadduukiriddwa mu bwangu,omuwendo gwabaalifiridde mu kabenje kano gwalisussewo. #
