Ab’ebyokwerinda mu district ye Bukomansimbi bakutte abasajja 3 ku bigambibwa nti babadde bakungaanya ensimbi mu bantu, nga babasuubizza okubafunira obuyambi bwa sente n’okuweerera abaana babwe mu masomero.
Abakwate kuliko Kalyesuubula Rashid 40,Ssebugwawo Abu Hamza myaka 28 ne Kiwa Joseph myaka 30 nga bagamba nti batuuze ba Munyendo e Masaka.
Bakwatiddwa ku ssomero lya Giant Secondly e Kagologolo webabadde bakungaanyirizza ekibinja ky’abantu bebabadde babagala okukunganyaamu ensimbi.
Abakwate bagamba nti mu gombolola ye Butenga ku kyalo Kisiita ne Kibinge gyebasookedde babadde bakolagana ne Mukiibi Dalawusi abadde amatiza abantu okusasula.
Mu gombolola ye Kitanda ne Kagologolo balumirizza Walugembe Meddie nti yaabadde akunga abantu okuyingira mu kintu ekyo nga bakayungirizi, nti wabulabbo olulabye police nebadduka.
Buli mwana eyetaaga okuyambibwako ku bya school fees nga bamuwandiisiza shs 20,000/=, ate family eyetaaga okufuna obuyambi okuva mu wofiisi ya ssabaminister nga nayo yewandiisa ne shs 20,000/=, nga babasuubizza okubawa emitwalo 400,000/=.
Amyuka RDC e Bukomansimbi Ssalongo Kalema Fred Pax nga yakulembeddemu ekikwekweto kino,agambye nti abantu abasoba 100 bebabadde bakagyibwako ensimbi mu gombolola ye Butenga naddala kukyalo Kisiita ne Kagologolo, Mukiibi Dalawusi gy’abadde yasimba amakanda.
Bisakiddwa: Ssebuufu Mubaraka Junior
