Bazzukulu ba Mugema abeddira e Nkima ne bazzukulu ba Nankere abe Mamba Kakoboza, besozze fayinolo y’empaka z’ebika by’Abaganda ez’omupiira ogw’ebigere ez’omwaka guno 2026.
Emipiira gya semifayinolo gizannyiddwa mu kisaawe e Wankulukuku, era e Nkima okugenda ku fayinolo ekubye e Ngo goolo 1-0, ate ne Mamba Kakoboza ekubye e Kkobe goolo 1-0.
Mu ngeri yeemu bazzukulu ba Katongole abeddira e Nte ne bazzukulu ba Gabunga abe Mamba, besozze fayinolo y’empaka z’ebika by’Abaganda ez’okubaka.
Ku semifinal e Nte ekubye bannantameggwa b’empaka za 2025 ab’Ennyonyi Ennyange obugoba 46 ku 42.
Emamba Namakaka nayo ekubye Engabi Ensamba obugoba 53 ku 37, ng’emipiira gino nagyo gibadde Wankulukuku.
Kakaano final egenda kuzannyibwa nga 06 omwezi ogujja ogw’omukaaga mu kisaawe e Wankulukuku.
Ebyo nga biri bityo, ttiimu y’essaza Buddu erumbye Kabula omwayo mu kisaawe e Bakijjulula Lyantonde n’egikubirayo goolo 2-1 mu mupiira ogw’omukwano, nga amasaza gano getegekera empaka za Masaza ga Buganda ez’omupiira ogw’ebigere ez’omwaka guno 2026
Mungeri yeemu ttiimu y’essaza Kyaggwe erumbye Ssingo omwayo n’egikubirayo goolo 1-0 mu mupiira ogw’omukwano oguzanyiddwa mu kisaawe ky’essaza e Mityana, era kuno Ssingo kwetongoleza ttiimu yaayo egenda okuvuganya mu mpaka ez’omwaka guno.
Mungeri yeemu Buweekula egudde maliri ne Gomba goolo 1-1 mu kisaawe kya Mubende NTC, nga ku mupiira guno Buweekula era kwetongolezza ttiimu egenda okuvuganya mu mpaka ez’omwaka guno 2026.
Empaka za Masaza ga Buganda zigenda kutandika nga 13 omwezi ogujja ogw’omukaaga e Mubende era bannantameggwa b’empaka ezasembayo aba Buweekula bagenda kuggulawo nga bambalagana ne Kyadondo.
Bisakiddwa: Isah Kimbugwe
