Olukiiko oluddukanya empaka z’ebika bya Baganda, lukakasiza nti abantu bonna abagenda ku mipiira egigenda okuggulawo empaka z’ebika bya Baganda ez’omwaka 2026, bagenda kusasulayo ensimbi shs 5,000 ku miryango, ate nga abaana abato bakuyingirira bwerere nga bulijjo.
Empaka z’ebika bya Baganda ez’omwaka guno zigenda kuggulwawo ku lw’omukaaga luno nga 02 omwezi ogw’okutaano, mu kisaawe e Wankulukuku.
Omupiira ogw’ebigere e Mamba Namakaka y’egenda okusooka mu kisaawe ng’ettunka ne Ngeye ku ssaawa 9 ez’olweggulo.
Oluvanyuma ku ssaawa 1 ey’akawungezi ku bitaala, wakuddawo Omusu nga guttunka ne Nte.
Wakubaawo n’emizannyo emirala okuli empaka ez’okubaka mu nkola eya Gala, okusika omugwa ate nga n’ebika byonna bigenda kuyisa ekivvulu.
Minister wa bavubuka ebyemizannyo n’ebitone Owek Ssalongo Robert Sserwanga, bwabadde akulembeddemu olukiiko oluteesiteesi okwekeneenya emirimu egikolebwa mu kisaawe e Wankulukuku mu kwetegekera empaka zino, akakasiza nti abantu bonna abatafunye kaadi zibayita ku mupiira guno bagenda kusasulayo enkumbi 5, era asabye abantu ba Buganda okujja mu bungi okuwagira ebika byabwe.
Engabi Ensamba be bannantameggwa b’empaka ezasembayo ez’omupiira ogw’ebigere , ate e Nnyonyi Enyange be bannantameggwa b’empaka ez’okubaka eza 2025.
Bisakiddwa: Isah Kimbugwe
