Ssaabasajja Kabaka asiimye naasimbula emisinde gy’amazaalibwa ge ag’e 71, mu lubiri e Mengo.
Omutanda emisinde agisiimbudde ku saawa bbiri zennyini ezokumakya, ku Sunday nga 12 April,2026.
Gino gy’emisinde egy’omulundi ogwe 13, okuva lwegyatongozebwa mu 1914.
Nnyinimu asoose kusimbula abaddusi aba kilometre 21, nekuddako aba10 km ne 5.
Emisinde gino giddukiddwa okwetoloola Uganda yonna n’amawanga g’ebweru ewali abantu ba Nnyininsi Sseggwanga Musota.
Emisinde egimu gisimbuddwa ku masaza, ku magombolola, ku masinzizo, so nga waliwo n’abantu abaguze emijoozi nebaddukira mu maka gabwe nga bwebetoloola empya zabwe.
Emisinde egiddukiddwa mu lubiri gyetabyeko Katikkiro wa Buganda Charles Peter Mayiga, abamyuka be Owek. Twaha Kawaase Kigongo ne Owek. Robert Waggwa Nsibirwa.
Nnabagereka Sylivia Nagginga, abambejja n’abalangira babaddewo mu Lubiri e Mengo.
Senkulu wa kampuni ya Airtel atwala Africa yonna, Sunil Taldar abaddewo awamu ne Ambassador wa Germany mu Uganda Mathias Schauer.
Embeera y’obudde ebadde nzikakkamu bw’ogerageranya n’emisinde gya 2025 enkuba bweyafudemba, era abantu abasiinga baddukira mu bitundu gyebabeera.
Ssaabasajja Kabaka yazaalibwa nga 13 April,1955.
