Eby’olutalo wakati wa Amerika ne Iran byongedde kufuuka lutaakome; era ng’olutalo luwezezza wiiki nnamba okuva lwe lwatandika, omukulembeze wa Amerika Donald Trump azzeemu okulayira nti talina kirala ky’ayagala kuwuliriza, okuggyako abakulu mu Iran okulangirira nti bawanise.
Trump ng’ayita ku kibanja kye ku mutimbagano agambye nti Iran w’etuuse tekyayinza kusimattuka busungu bwa Amerika, wabula abagirwanirira gye banaakomya okwanukula, eggwanga eryo gye linaakoma okufuuka amatongo.
Trump era akisimbyeko amannyo nti tagenda kukkiriza kulonda mukulembeze mulala atakkaanya na Amerika, era n’asuubiza nti singa bafuna omukulembeze akkaanya ne Amerika, Amerika egenda kukwatirako Iran okuddamu okuzimbibwa etemagane n’okusinga bwe yali ebadde.
Trump agenze okwogera bino nga Israel nayo yaakafulumya amawulire amalala, nti ekubye n’esaanyawo enkambi y’amagye ga Iran eyazimbibwa mu ttaka mu kibuga ekikulu Tehran.
Amawulire agava mu ddwaniro gagamba nti empuku Israel gy’ekubye; yali yazimbibwa nga y’eneebeera obuddukiro bwa Ayatollah Ali Khamenei eyattiddwa, era gy’abadde agenda okutuulizanga enkiiko zonna ez’ekyama era ezitalinda, ezikwata ku by’okwerinda.
Enkambi eyo Israel egiwandagazzaako ebikompola, nga ekozesa ennyonyi ennwanyi 50 omulundi gumu.
