Police mu Kampala n’emiriraano etandise okunoonyereza ku muliro okugutte ennyumba mu e Kikaaya mu gombolola ye Kawempe mu Kampala, abantu 2 bafudde ate omu asigadde n’ebisago eby’amaanyi.
Okusinziiraa ku police, abafiiridde mu njega y’omuliro eno kuliko Kobusingye Monica myaka 21 so ng’omwana we ow’emyezi 4 asigadde n’ebisago, omulala afidde ategerekeseko erinnya limu erya Mulokole.
Kigambibwa nti omuliro guno gwatandikidde mu nnyumba y’omutuuze omu amanyiddwa nga Edgar owokukyalo kyekimu, negusasanira bamulirwana abalala, wabula abamu basobodde okudduka okwetegula ekibambulira.
Wabula Monica ne munne omulala abafudde balemeddwa okwetasa era omuliro ne gubookya ne basirikka.
Omwogezi wa police mu Kampala n’emiriraano Racheal Kawala agambye nti emirambo gitwaliddwa mu ddwaliro lya KCCA okwongera okwekebejjebwa ng’okunoonyereza ekivuddeko omuliro bwekugenda mu maaso.
Wabula asabye abantu okwegendereza byebakozesa awaka naddala nga bisobola okuvaako obulabe ng’omuliro n’ebirala.#
