Omulamuzi wa kkooti enkulu Emmanuel Baguma nate agaanye okuva mu musango oguvunaanibwa Rtd Col Dr Kizza Besigye munnakibiina ku PFF ne munne Hajji Obeid Kaamulegeya, era agobye okusaba kwabwe mwe babadde baagalira omusango ogwo gusindikibwe mu kkooti enkulu ewozesa egya ba kalintalo.
Munnamulaye omulamuzi Emmanuel Baguma akinogaanyizza nti kkooti enkulu ewozesa egya nnaggomola ddala yéntuufu era ssemateeka gyeyawa obuyinza okuwozesa emisango egyókulya mu nsi olukwe.
Alamudde nti Besigye byálumiriza nti bamuwozesa mu kkooti nkyamu tebiriiko mutwe na magulu.
Omulamuzi Baguma akikkaatirizza nti ensala ye eyasooka mwe yammira Besigye omukisa ogwókweyimirirwa, omuwawaabirwa tayinza kugyesigamako, okumulumiriza nti alina kyekubiira, era nánnyonnyola nti omusango ogwo okugumukwasa baayita mu mitendera emituufu egirambikiddwa mu mateeka.
Oluvannyuma lwa bino bwatyo Dr Kiiza Besigye alagidde bannamateeka be abakulembeddwa Earnest Kalibbala, ensonga zino bazongereyo mu kkooti ya ssemateeka, nga yeebuuza oba ddala omulamuzi oyo Baguma asobola okulemera mu musango ogwo, ngáte baamuwaabira dda mu kakiiko akalondoola enkola yémirimu gyéssiga eddamuzi, era ngénsonga ezo tezinnasonjolwa.
Bisakiddwa: Betty Zziwa
