Bannabyabufuzi Ku ludda oluvuganya government abaali mikwano gya Col. Samson Monday, bamuseredde olw`okwejulula naava Ku mulamwa ogwamutwala mu nsiko, ogw’okuggya president Yoweri Kagita Museven Tibuhaburwa mu buyinza, nti era emyaka gyona gyabonaabonedde gimusaliidde bwereere.
Akulira akakiiko keby`okulonda mu FDC Toterebuka Bamwenda, agambye nti kino Col Samson Monday kyakoze kubadde kulya mu balwanyi banne lukwe.
Munnakibiina kya People’s Front for Freedom Salamu Musumba asabye bannauganda basonyiwe Samson Monday, kubanga kirabika essuubi lyeyalina ery`okukyusa obuyinza limuweddemu.
Col Samson Monday yali omu ku bayeekera ab’amaanyi mugye lya NRA eryaleeta government ya NRM mu buyinza, wabula oluvanyuma nakola ekibiina kyabayekera ekikye ekyatuumibwa People’s Redemption Army ekyatigomya ennyo government ya NRM.
Mu kukuza amefuga ga Uganda ag’omulundi ogwe 63 nga 09 October,2025, Col Samson Monday ayingiddewo mu Kisaawe e Kololo mu ngeri yebyewuunyo, era buli muntu abaddewo neyebuuza engeri gyeyayingiddemu eggwanga.
Kibadde kitutte emyaka egisoba mu 20 okuva lweyadduka mu ggwanga ng’awenjezebwa amagye, oluvannyuma lw`okudamu okufuuka omuyeekera.
Mu Kalulu ka 2001, Col. Monday yegatta ne Dr. Col.Kiiza Besigye bawangule president Museveni mu kalulu, wabula tekyasoboka.
Oluvannyuma lw`okuwenjebwa ebitongole byeby`okwerinda, yadduka mu ggwanga nasooka agendako e Rwanda, oluvanyuma nadda mu ggwanga lya Sweden gyamaze emyaka egisoba mu 20.
Col Samson Monday bwalabiseeko e Kololo, ategezeezza ababaddewo nti akomyewo ewaka ng’ategedde ensobi ze, naajuliza ekyawandiikibwa mu bbayibuli, nti bweyali omuto yalowooza ng`omuto era nga alowooza byakito naye kati akuze.
President Museven naye asinzidde wanno nayaniriza Con Samson Monday ewaka, era namukulisaayo mu buwanganguse.
Bisakiddwa: Musisi John
