Eklezia Katulika mu Uganda ekungubagidde Omulangira Dr Paul Mawanda Kyabaggu abadde munnamakolero omukukuutivu era munnabyanjigiriza eyafudde, oluvannyuma lw’okulwalira akaseera akatono.
Omulangira Kyabaggu ye mutandisi wa kkampuni eya Bukoola Chemical Industries, emanyiddwa okukola eddagala ly’ebirime n’ebisolo, nga kkampuni eyo yagitandika mu 1973.
Mu ngeri yeemu omugenzi Dr Paul Kyabaggu yabadde Omutandisi w’essomero lya St Joseph of Nazareth erisangibwa e Kavule-Katende mu ssaza Mawokota.
Asibuka Kannabulemu kakuuto mu district ye Kyotera mu ssaza Buddu.
Vice Chancellor w’essaza ekkulu erya Kampala, Msg.Charles Kasibante asinzidde mu kitambiro ky’emmisa ekitegekeddwa mu maka g’omugenzi e Lubowa, natendereza emirimu enkumu Omulangira Kyabaggu gy’akoledde eklezia, era nti abadde agikola mu kasirise.
Yaliko ssaabakristu wa lutikko ye Lubaga, aziimbye eklezia, aweeredde abasasorodooti n’abaana abalala bangi.#
