Banna byanjigiriza n’abakulembeze ba ssentendekero ez’enjawulo mu mawanga ga East Africa, balabudde ku kizibu kya tekinologiya eyeyongedde mu nsi, nti aviiriddeko omutindo gw’abasomesa n’abayizi okukka nga tebakyalowooza kimala ku byebakola.
Banokoddeyo ekizibu kya tekinologiya amanyiddwa nga Artificial Intelligence, (AI), gwebagamba nti wadde mulungi era asaanidde okuteekebwako essira n’okujjumbirwa naye bakizudde nti aletedde bangi obutalowooza kimala.
Babadde mu lukuηaana olumaze ennaku 3 ku Speke Resort e Munyonyo, olwetabiddwamu abakwatibwako ensonga mu kwetegereza omutindo gwebyenjigiriza naddala ku mutendera gwamatendekero agaawaggulu.
Bagamba nti ssinga tewabaawo kikolebwa okuluηaana enkozesa za tekinologiya mu matendekero, ebyenjigiriza byakukonzibira ddala.
Prof Paul Muoki Nzioki, president w’omukago ogutaba abalondoola omutindo gw’ebyenjigiriza mu matendekero agawaggulu mu East Africa ogwa East African Higher Education Quality Assurance Network, agambye nti baliko enkola zebateeseteese eziweza emiko 18, ezinayambako okutereeza ebyenjigiriza n’okukugira enkozesa ya AI ng’abayizi baddamu ebibuuzo.
Agambye nti mu nnambika zebayisizza bataddemu nebinagobererwa mu kubangawo enkola ey’okusasula ebisale ebifaanagana mu matendekero mu mawanga gannamikago, okukwanaganya omutindo nebirala ebinagobererwa mu kusomesa abayizi ku mutendera guno.
Omukago gwa East Africa gulimu amawanga 8 okuli Uganda, Tanzania, Kenya, Somalia, DRC, Rwanda, Burundi, ne South Sudan.
Olukuηaana luno olutudde okwetegereza omutindo lubadde lugoberera ebyasalibwawo ba minister beebyenjigiriza mu mawanga ago, abaatula okuteesa ku nsonga zeezimu wiiki eyise.
Ssenkulu waakakiiko akalondoola amatendekero agawaggulu mu Uganda, Prof Mary Okwakol, asinzidde mu kuggalawo olukuηaana luno, naagamba nti ebikanyiziddwako bigenda kuganyula nnyo abayizi mu mawanga gannamukago kuba bagenda kufuna emirimu mu mawanga agenjawulo awatali kubuusibwabuusibwa bukugu bwabwe.
Bisakiddwa: Ddungu Davis
