Government ya Uganda esuubizza okwongeza omusaala gwabakulembeze abalonde okuva ku ba ssentebe b’ebyaalo okutuuka ku mutendera gwenaaba esazeewo, naddala abo abafuna omusaala omutono
Minister wa government ezebitundu Rafael Magyezi asinzidde mu parliament naagamba nti president Yoweri Kaguta Museveni Tibuhaburwa yakkiriza abakulembeze abo omusaala gwagwe gwongezebwe okutandiika n’omwaka gw’ebyensimbi ogujja 2026/2027
Minister Magyezi agambye nti ministry ye eya government ez’ebitundu yalagiddwa okukola ekiwandiiko oba alipoota egitwaale mu Lukiiko lwaba minister ensonga eno eyisibwe.
Mu kiseera kino, ba ssentebbe bebyaalo neba ssentebbe bemiruka basasulwa omusaala gwa shillings 10,000 buli mwezi nga gyemitwaalo 12 buli mwaka.
Bo ba ssentebbe ba district nga kalonda misolo gyonna amaze okusalibwako, basigaza omusaala ogutasukka million 2 buli mwezi, songa bo ba kansala ba district omusaala gwaabwe teguweza mitwalo 30 buli mwezi.
Minister Magyezi okuwa alipoota eno eraze nti gavument egenda kwongeza omusaala gwabakulembeze abalonde, asinzidde mu parliament bwabadde ayanukula okwemulugunya okwatwalibwa eri sipiika wa parliament Annet Anita Among okuva eri abakulembeze ba government ez’ebitundu nti bakooye okukolera ebitole byemmere songa bebasinga okukola emirimu emingi.
Sipiika wa parliament Anita Among kulwa parliament yeyamye, okuteeka essira ku nsonga eno mu mbalirira y’omwaka ogujja 2026/2027.
Uganda erina abakulembeze abakunukiriza mu bukadde 2 ku mitendera egyenjawulo okuli ba ssentebe b’ebyalo, abemiruka, abamagombolola, aba districts ,ba kansala ,obukiiko bwabakyala, ababaka ba parliament ,ba ssentebe ba districts nabalala.#
