Ekitongole ekiwooza kyomusolo ki URA kirangiridde nti kirina esuubi okukuηaanya omusolo ogusukka mwogwo ogwakigerekerwa okukuηaanya mu mwaka gw’ebyensimbi guno 2024/2025 okusinziira ku bubonero obuliwo.
Mu mwaka gw’ebyensimbi guno 2024/2025, government ng’eyita mu parliament yagereka omusolo gwa trillion 31 n’obuwumbi 574 ekitongole ki URA gwekirina okukuηaanya okuwanirira embalirira y’eggwanga eya trillion e 72.
Ssenkulu wa URA John Musinguzi Rujoki abuulidde CBS nti okusinziira ku bibalo byebalina, n’omusolo gwebakakuηaanyawo emyezi 10 egiyise, balina esuubi nti mu myezi ebiri egisigaddeyo baggya kuweza omuwendo ogwabagerekerwa n’okusingawo.
Mu mwaka gw’ebyensimbi ogujja 2025/2026, government yagerese omusolo gwa trillion 34 URA gwerina okukuηaanya.
URA egambye nti nagwo erina esuubi nti eggya kugukungaanya singa emiwaatwa egigootaanya okukuηaanya omusolo nebannansi okulyazamaanya omusolo gizibwa.
Egimu ku miwaatwa URA gyekolako mu kiseera kino okusinziira ku ssenkulu wa URA John Musinguzi, kwekulambika n’okutereeza enkola y’abasuubuzi abaleeta ebyamaguzi mu kirindi.#
