Ababaka ba parliament abasinga obungi mu bakkiriza ebbago ly’etteeka government lyeyagala okuyitamu okuggyawo ekitongole ekikola ekikoka ku mutindo gw’emmwanyi ki Coffee Development Authority (UCDA) nti lissomebwe omulundi ogwokubiri.
Okusinziira ku mateeka agalungamya entambuza y’emirimu mu parliament ebbago ly’etteeka singa lissomebwa omulundi ogwokubiri, libeera lisemberedde okuyisibwa era tekitera kubaawo ebbago eryo okulemwa okuyita.
Government eyagala ekitongole kino ki UCDA ekiggyewo, obuvunanyizibwa bwakyo ebutwaale mu ministry y’ebyobulimi n’obulunzi.
Wakati mu kusika omuguwa okubadde mu parliamanet , ababaka ababadde baagala kitongole kino kisigalewo naabo ababadde bawagira enteekateeka ya government, sipiika wa parliament awaliriziddwa okuyimirizaamu olutuula okumala akabanga, kisobozese kalaani wa parliament okubala omuwendo gw’ababaka ababadde bawakanya n’ababadde bawagira ebbago lissomwe omulundi ogwokubiri.
Gyebigweeredde, ng’ababaka 77 bebawakanyizza ekyokussomebwa kw’ebbago lino omulundi ogwokubiri, songa ababaka 159 bebasembye okussomebwa kw’ebbago lino omulundi ogw’okubiri.
Sipiika wa parliament olumaze okulangirira nti abakkiriza ebbago lissomwe basinze obungi, parliament agisindiise mu luwumula olutali lugere.
Kisuubirwa nti parliament lwekkomawo okuva mu luwummula ebbago lyakussomwa omulundi ogwokubiri, olwo parliament yetegereze ennyingo government zeyesigamyeko okuggyawo ekitongole ki UCDA oluvanyuma eriyise.
Sipiika yoomu, alagidde nti kalonda yenna akwata ku babaka abawagidde naabo abawakanyiza eky’okuggyawo ekitongole ateekebwe ku mikutu gya parliament abaliddawo bamussome.
Ekitongole ki UCDA okusinziira ku government, kyakugira nga kisigalawo okumala emyaka 3 nga government bweteereza ebitatambula bulungi mu ministry y’ebyobulimi, egenda okutwala obuvunanyizibwa bwekibadde kikola.
Ababaka abenjawulo abatawagidde bbago lino, basigadde bakukulumira government olw’enteekateeka yaayo gyebagambye nti egenda kuttattana ekirime ky’emwaanyi n’okukuumira bannansi mu bwavu.#
