Omukulembeze w’ekibiina ki Justice Forum Uganda JEEMA Asuman Basaalirwa awandiikidde mukulembeze munne owa Forum For Democratic Change (FDC) Eng Patrick Oboi Amuriat ng’amukomako ne bannakibiina kye baleme kugenda mu maaso nga baanika obuziina bwabwe mu lujjudde.
Asuman Basalirwa mu bbaluwa gy’awandiikidde Eng Amuriat agambye nti FDC emanyiddwa ng’ekibiina eky’amaanyi era ekirina eby’okulabirako bingi ebisimbyemu mu mugendo gw’enkyukakyuka, nga n’olwekyo bwekyanika obuziina kibeera kiwa enkizo government eri mu buyinza okwongera okubafuttubbalako.
Asuman Basalirwa asabye bannaFDC okukozesa empagi z’ekibiina okugonjoola obutakaanya obuliwo nga kikolebwa munda mu kibiina, sso ssi mulujjudde nga bwekiri mu kiseera kino
Basalirwa agambye nti singa FDC emwetaaga ,wali nnyo era mwetegefu okutabaganya enjuyi zombi eziggugulana okumalawo obutakaanya.
Ekibiina ki FDC wiiki 2 eziyise, kyagwamu nnabe ebiwayi bibiri okuli ekikulemberwa Ssemujju Nganda omubaka wa munisipaali ye Kira era omwogezi wekibiina, ne lordmayor wa Kampala Ssaalongo Elias Lukwago nekiwayi ekikulemberwa Nathan Nandala Mafabi ssabawandiisi w’ekibiina ne eng Patrick Oboi Amuriat president wekibiina baatandika okweyogerwra amafukuule.
Ekiwayi Kyomubaka Ibrahim Ssemijju Nganda kirumiriza ekiwayi Kya Nathan Nandala Mafabi okufuna ensimbi nti okuva ewa president Yoweri Kaguta Museveni nekigendererwa ekyokutunda FDC mu NRM.
Era balumiriza nti ku nsimbi ezo kwekwava n’omutemwa ogwavugyirira Patrick Amuriat okwesimbawo ku bwa president mu kalulu ka 2021, n’ekigendererwa eky’okukendeeza ku bululu bwa munna NUP Robert Kyagulanyi Ssentamu eyali asinga amaanyi ku ludda oluvuganya government.
Wabula bino yonna Amuriat ne Nandala baabiwakanya mga bagamba nti wadde baliko ensimbi zebaafuna okuva mu makubo ameekusifu, nti naye tezaava mu NRM.#