Government ya Uganda erangiridde nti egenda kufuula eddagala lya Nalubiri (Sicklecell) ery’Enkizo mu malwaliro gaayo gonna, kiwe Omwagaanya abalwadde ba Nalubiri okufuna obujjanjabi obusaanidde mu budde.
Enteekateeka eno eyanjuddwa Omutesiteesi omukulu mu ministry y’Ebyobulamu Dr. Diana Atwiine, abadde ku mukolo ogw’Okutongoza Eddagala lya Nalubiri erimanyiddwa nga Sikurea Hydroxyrea 500mg e Luzira ,likoleddwa kampuni ya Quality Chemicals limited.
Dr.Atwiine ategeezezza nti okukolebwa kw’Eddagala lino erikoleddwa mu capsule, wano mu Uganda kigenda kumalawo okukaluubirizibwa government kwebadde esaanga mu kuligula ebweru w’Eggwanga, omubadde ensimbi eziggweera mu ba kayungirizi , okulitambuza n’Obukuumi obubadde bulissibwako.
Dr. Atwiine agambye nti waliwo essuubi nti omuwendo gw’Abaana abato abali wansi w’emyaka 5 ababadde bafa olwa Nalubiri gugenda kukendeera.
Akubirizza abantu abalowooza okufumbirigana nti basooke beekebeze bamanye webayimiridde ku bya Nalubiri.
Omu ku batandisi ba Quality Chemicals Limited,Rotarian Emmanuel Katongole , agambye nti ekkula ly’Okukola eddagala erijjanjaba Nnalubiri lyavudde mu bimu ku birowoozo ebyabaweebwa president Museveni, bwebaali baakamaliriza emisomo gyabwe ku Makerere University nga baali George Baguma ne Fred Mutebi Kitaka.
Emmanuel Katongole ategezezza nti bazze basenvula mu bika by’Eddagala erizze likolebwa, nga kati litundibwa ku katale kensi yonna omuli eriweweeza Mukenenya, Omusujja gw’Ensiri neddala lingi, kino nga kiwadde Uganda ettutumu eritagambika.
Dr.Deogratious Mulube omukugu mu kujjanjaba endwadde ezenjawulo asabye abazadde okwekeneenya ennyo abaana baabwe naddala abato, n’Okubatwala mu malwaliro okubakebera, bwekizuuka nga baliba Nalubiri bafune obujjanjabi nga bukyali.
Mu ngeri eyenjawulo Dr. Mulube asabye abakozesa mu bitongole ebyenjawulo okukomya okusosola abalina obulwadde bwa Nalubiri nga babamma emirimu, kyagambye nti kikolwa kya busosoze.
Bisakiddwa: Kato Denis
