Olukiiko oluddukanya emizannyo gya masomero ga senior olwa Uganda Secondary Schools Sports Association, lukoze enkyukakyuka mu mpaka ezenjawulo ezetabwamu amasomero ga senior buli mwaka, okuwa omukisa abayizi ab’emyaka gyonna okuvuganya.
Empaka za U16 zigiddwawo ne zisikizibwa empaka za U17, ate nga n’empaka za U14 zigiddwawo ne zisikizibwa eza U15.
President wa Uganda Secondary Schools Sports Association, Justus Mugisha, bwabadde akulembedemu olukiiko lwe kibiina olutudde ku GNS Plaza mu Kampala, agambye nti kino kikoleddwa okuwa abayizi bonna omukisa ku mutendera gwa senior okuvuganyanga mu mpaka zino.
Munkyukakyuka empya, abayizi bakuvuganyanga mu mpaka za mirundi 3 okuli eza U20 ezigenda okwetabwamu abayizi ab’emyaka 16, 17, 18, 19 ne 20.
Empaka eza U17 ezigenda okwetabwamu abayizi ab’emyaka 15, 16 ne 17.
Empaka endala ze za U15 ezigenda okwetabwamu abayizi ab’emyaka 13, 14 ne 15.
Bisakiddwa: Isah Kimbugwe
